Thonë se nuk ka dhembje më të madhe se ajo e një prindi për fëmijën. Por një baba në Kinë e ka kthyer në forcë humbjen e fëmijës 5-vjeçar, duke u shpëtuar jetën pesë njerëzve të tjerë.
“Mami, më vjen shumë keq. Nuk do të bie në koma, jam mirë”. Këto kanë qenë fjalët e fundit të vogëlushit 5-vjeçar Weiwei, para se të humbte betejën me kancerin.
Vogëlushi nga provinca Zhanjiang e Kinës ka ndërruar jetë në 23 nëntor në spital, si pasojë e tumorit në tru, bën të ditur agjencia “Xinhua”.
Pavarësisht dhimbjes, familja e tij ka vendosur t’i japë organet e vogëlushit për pacientë të tjerë që kishin nevojë. Brenda të njëjtës natë, pesë pacientëve të tjerë u është ndryshuar jeta.
Vendimi i familjes së djalit është pritur me kundërshtime në fshatin ku ata jetojnë, por prindërit thonë se djali i tyre do të ishte i lumtur me këtë zgjedhje.
Mëlçia dhe dy veshkat janë transplantuar në tre pacientë, ndërsa dy djem kanë fituar shikimin pas dhurimit të kornesë.