Një grua i dha lamtumirën së ëmës me një puthje, pasi stafi i spitalit e deklaroi të vdekur gruan e moshuar. Por shtatë orë më vonë, stafi i spitalit i telefonoi vajzës dhe i tha se i kishte treguar kufomën e gabuar. Liz Page, 61 vjeçe, dhe i shoqi Gerry, 72 vjeç, thanë se në ato momente ndienin gëzim dhe indinjatë njëherësh.
“Nuk mund ta besoja. Isha e inatosur dhe e gëzuar njëkohësisht. Ata na thanë: Na vjen shumë keq që ju kemi keqinformuar, por nëna juaj nuk ka vdekur. Ajo është zhvendosur në një pavijon tjetër dhe është mirë. Gruaja e vdekur kishte një emër të ngjashëm dhe kjo na ngatërroi”.
Pacientja 94-vjeçare ishte shtruar në spital pas një hemorragjie cerebrale. Vajza dhe i shoqi e kishin kaluar natën pranë saj, ndërsa të nesërmen ishin kthyer në shtëpi, pasi gruaja e moshuar ishte nën kujdesin e stafit.
Liz është zgjuar natën dhe meraku për të ëmën e ka shtyrë t’i bëjë një telefonatë spitalit. Infermieret e kanë njoftuar për vdekjen e nënës dhe ajo ka vrapuar menjëherë në spital.
“Një infermiere më çoi te ajo. Qëndrova vetëm 3 minuta. I thashë lamtumirë dhe e putha në ballë. Më pas dola”, tregon e bija.
“E di që tingëllon qesharake të mos e kuptosh se ke të bësh me trupin e dikujt tjetër. Por kur të thonë se nëna të ka vdekur dhe të çojnë në dhomë, ty nuk të shkon mendja se mund të mos jetë ajo”, thotë gruaja.