Fadil Riza është një artistëve të shumtë të skenës muzikore, që këtij profesioni i hyri jo nga nevoja për të fituar, por për nevojën për të kënduar. Ai përveç projekteve të reja që sjell kohë pas kohe, ai i qëndron besnik edhe këngëve të vjetra popullore, pasi që sipas tij, të këndosh ato këngë është respekt ndaj kombit tënd.
“Bota sot”: Fadil me çka jeni duke u marrë aktualisht?
Fadil Riza: Kohët e fundit merrem me muzikë, angazhimin në muzikë nuk e ndaj në sezona, sepse nëse pak e braktis atë është vështirë ta rikuperosh kohën e humbur.
“Bota sot”: Si jeni bërë pjesë e muzikës?
Fadil Riza: Si pjesë e muzikës jam bërë jo nga nevoja për të fituar, por për të kënduar, pasi ndjehem i plotësuar vetëm atëherë kur jam i angazhuar me të.
“Bota sot”: Na flisni pak për vetën tuaj?
Fadil Riza: Përveç muzikës merrem edhe me sport që më ndihmon mjaft për dukjen skenike dhe formën e mire shpirtërore. I pëlqej shëtitjet prandaj lëviz dhe shumë në kryeqendrat shqiptare dhe një vikend më gjen në Tiranë, tjetri në Shkup e tjetri në Prishtinë.
“Bota sot”: Kush janë bashkëpunëtorët tuaj?
Fadil Riza: Bashkëpunëtoret e mi janë të shumtë. Kompozitorë dhe tekstshkrues, regjisorë e producentë, të cilët ua dedikoj dhe një pjesë të suksesit tim. Një falënderim të posaçëm edhe për Rikin për mbështetjen e tij të vazhdueshme në sferën profesionale.
“Bota sot”: Ju këndoni shpeshherë edhe këngët më të vjetra të përpunuar. A do të thotë kjo se dikur këngët kishin më shumë vlera?
Fadil Riza: Të këndosh këngë të vjetra do të thotë të nderosh, respektosh të kaluarën tënde si popull, por kjo nuk do të thotë që këngët e sotme nuk kanë vlerë, përkundrazi është bërë dhe po bëhet punë e madhe në këtë drejtim.
“Bota sot”: Cilën e konsideroni si këngën më të suksesshme në karrierën tënde?
Fadil Riza: Nuk mund ta definoj, atë e definon publiku, unë i kam kënduar të gjitha me gjithë shpirt, he-he (qeshet)
“Bota sot”: Sa mendoni që vlerësohet puna e artistëve në Kosovë?
Fadil Riza: Muzika mendoj vlerësohet shumë, duke marr parasysh edhe nivelin tonë si shoqëri, prapë se prapë artistët janë kategoria më e vlerësuar e shoqërisë nëse i krahason me kategorinë e arsimtarëve, mjekëve, policëve etj.
“Bota sot”: Diçka për fund për adhuruesit tuaj?
Fadil Riza: Dhe në fund adhuruesve iu them, ky nuk është 'fundi' por vetëm fillimi, tjera projekte dhe surpriza do të kem për ta në një të ardhme të shpejtë.