Drejtoria për Udhëheqjen e Librave Amë në bashkëpunim me Ministrinë e Punës dhe Politikës Sociale publikon thirrje për grumbullimin e të dhënave për personat e paregjistruar në Librin amë të të lindurve. Ftohen të gjithë personat që nuk e kanë regjistruar lindjen në Librin amë të të lindurve, të parashtrojnë kërkesë për regjistrim në Librin amë të lindurve.
“Në kuadër të këtij thirrjeje, nëse personat nuk posedojnë asnjë dokument/dëshmi të nevojshme për parashtrimin e kërkesës për regjistrim shtesë, nëpunësi do të jetë i detyruar të pranojë kërkesën me qëllim që të grumbullojë të dhëna për personat që nuk janë të evidentuar në Librin Amë të të Lindurve dh marrjen e të dhënave zyrtare rreth asaj se sa persona në Republikën e Maqedonisë nuk janë të regjistruar në Librin Amë të të Lindurve”, thekson Bujar Dardhishta, drejtor i Drejtorisë për Udhëheqjen e Librave Amë.
Personat që do të paraqiten në këtë thirrje, e që nuk posedojnë asnjë dokument, do të informohen më tej rreth procedurës.
Thirrja për paraqitjen e një kërkese për regjistrimin shtesë dhe grumbullimin e të dhënave për personat që nuk janë të evidentuar në Librin Amë të të Lindurve, në përputhje me atë që u tha më lartë, do të zgjatë nga 2 prilli deri me 30 shtator 2018.
Për këtë qëllim, të gjithë ata që ballafaqohen me lindjen e paregjistruar në Librin Amë të të Lindurve, duhet të drejtohen vetëm në Zyrat rajonale të Drejtorisë për Udhëheqjen e Librave Amë, në përputhje me thirrjen në fjalë.