Nikolla Gruevski po vazhdon të mbjellë për cdo ditë Luana e statuja tjera në Qytetin e Shkupit.
Sot para selisë së VMRO-DPMNE është vendosur përmendorja gjigante e “Luanit”, simbol ky i partisë së kryeministrit Nikolla Gruevskit.
Ndërkaq, përmendoret e personaliteteve shqiptare Agollit, Bagerit dhe Bogdanit askund nuk duken.
Madje edhe shtatorja e Skendërbeut mbi kalë duket se ka humbur nga hija e përmendoreve gjigante të Fillipit II-të e Aleksandrit të Madh, raporton INA.
Që nga viti 2011 shqiptarët i presin këto përmedore të cilat partia shqiptare në pushtet nuk arriti ta realizojë asnjëherë ngritjen e tyre.
Madje zyrtarë të BDI-së, nganjëherë ngazëlloheshin dhe bënin selfije gabimisht me figura dhe përmendore të veprimtarëve maqedonas si Metodija Shatorov – Sharlo, duke menduar se janë monumente të shqiptarëve.
Nga BDI-ja heshtin dhe nuk komentojnë pengesat e mundshme që kanë bllokuar procedurën e vendosjes së përmendoreve shqiptare.
Nga ana tjetër Kreu i Komunës Qendër Andrej Zhernovski është shprehur disa herë se Komuna nuk do të pengojë ngritjen e 3 përmendoreve, por ato do të vendosen në momentin që do të jenë gati.
Procesi i vendosjes së përmendoreve të tilla pritej të përfundonte para disa viteve.
Përmendoret e Agollit, Bagerit dhe Bogdanit përveç vonesës së jashtëzakonshme, dallohen nga përmendoret maqedonase edhe për cilësinë.
Këtë e tregon edhe çmimi për punimin e tyre, që sillet mes 45 deri 50 mijë euro për ato shqiptare, ndërkohë që aq para shpenzoheshin vetëm për bazamentet e përmendoreve maqedonase.
