Mbi 200 persona nga Ministria e Punëve të Jashtme po marrin pjesë në përgatitjen e samitit të OSBE-së në Shkup, i cili do të mbahet në fund të këtij muaji. Ministri Bujar Osmani informon se është siguruar një fluturim çarter nga Brukseli për në Shkup për ministrat që do të jenë në këshillin ministror të NATO-s, nga ku do të vijnë 20 përfaqësues zyrtarë. Janë paraqitur më shumë se 1.000 anëtarë të delegacioneve.
Osmani thotë se ministri rus i Punëve të Jashtme, Sergey Lavrov ka dërguar një letër me kërkesë për pjesëmarrje në Shkup.
“Ka disa sfida lidhur me pyetjen e tij, duke qenë se hapësira ajrore e Maqedonisë është e mbyllur për avionët rusë, si edhe në vendet fqinje. Këtu do të duhet të bëhen përpjekje logjistike. Sipas rregullave, të gjitha vendet pjesëmarrëse duhet të marrin pjesë në këshillin ministror, por për persona të caktuar duhet të vendime shtesë. Shpresoj se të gjithë do të arrijmë të jemi në Shkup”, tha Osmani në konferencën e sotme për media.
Në pyetjen nëse nuk vjen ndonjë ministër rus në Shkup, si do të merren vendimet e OSBE-së pa qëndrimin e Rusisë, Osmani tha se Federata e Rusisë do të marrë pjesë me përfaqësuesit e saj, por duhet të gjithë të veprojmë në interesin kolektive të vendit.
Vlerësohet se për organizimin e konferencës së OSBE-së, ku do të marrin pjesë 70 ministra, Maqedonia do të ndajë 5 milionë euro.
