Në përputhje me aktivitetet dhe detyrimet e marra me anëtarësimin në NATO, Republika e Maqedonisë së Veriut ka siguruar strehim të përkohshëm për 68 afganë, aleatë tanë, të cilët paraprakisht kanë qenë të angazhuar nga NATO-ja gjatë misionit në Afganistan.
Këta persona janë pjesë e grupit më të madh të afganëve, të cilët ishin të vendosur në bazën “Behtel” (Bechtel Facility) në Kosovë, nga ku të gjithë afganët e evakuuar nga Kabuli janë shpërndarë përkohësisht mes shteteve anëtare të NATO-s. Këtyre personave, në vendin tonë u është siguruar strehim i përkohshëm, deri në rregullimin e dokumentacioneve për në destinacionet përfundimtare, me çka dhe u përcaktohet vendbanimi i tyre i përhershëm.
Me këtë hap, Maqedonia e Veriut, si partner kredibil i NATO-s, edhe një herë dëshmoi solidaritet në mbrojtjen e aleatëve tanë nga Afganistani, të cilët për shkak të rrezikut për jetën dhe sigurinë e familjeve të tyre nuk mund të kthehen në Afganistan.
Duke siguruar strehim të përkohshëm edhe për këtë grup afganësh, numri i përgjithshëm i civilëve afganë të cilëve Maqedonia e Veriut u ka ofruar qëndrim të përkohshëm kalon mbi 800 persona, më shumë se gjysma e të cilëve tashmë janë larguar nga Maqedonia e Veriut dhe janë drejtuar kah destinacionet e tyre përfundimtare.
Gjatë qëndrimit të tyre të përkohshëm në Maqedoninë e Veriut, afganëve u është ofruar ndihmë dhe mbështetje nga institucionet shtetërore dhe organizatat joqeveritare, duke e bërë kështu vendin pjesë të aksionit humanitar global për t’i ndihmuar afganët, të cilët me përkushtim kanë punuar në avancimin e proceseve demokratike në Afganistan ose kanë qenë të angazhuar nga ana e organizatave dhe agjencive ndërkombëtare, thueht në njoftimin e Ministrisë së Punëve të Jashtme.
