Një helikopter i Maqedonisë së Veriut dhe një i Malit të Zi, pasdite do ta shuajnë zjarrin në Komunën e Sarajit te fshatrat Raoviq dhe Bukoviq, edhe pse tanimë u lokalizua në pjesën e fshatit Raoviq.
“Një pjesë e zjarrit në fshatin Raoviq në Komunën e Sarajit u lokalizua, por te fshati Bukoviq, fshati Çajlan drejt Matkës ende është aktiv. Në orët e pasditës te ky zjarr do të intervenohet edhe nga ajri me 26 njerëz, me një helikopter nga Maqedonia e Veriut dhe një nga Mali i Zi”, informoi Nadica Vëçkova nga Qendra për menaxhim me kriza (QMK) në konferencën për shtyp, që u mbajt pasdite në QMK.
Ajo theksoi se zjarri në fshatrat Rakle, Nikodin dhe Toplicë në komunën e Prilepit është aktiv, por me intensitet të dobët.
“Zjarri është në terren jo të qasshëm. Në këtë moment në këtë zjarr intervenojnë ekipe nga vetaministrata lokale e Prilepit, Drejtoria për mbrojtje dhe shpëtim dhe ekipe të MPB-së nga Prilepi dhe Manastiri”, tha Vëçkova.
Është riaktivizuar, shtoi ajo, edhe zjarri mbi fshatin Bezgashtevë mes Berovës dhe Strumicës, drejt fshatit Niviçan në digën Turia.
Vëçkova tha se faktori njeri është shkaku më i shpeshtë për shkaktimin e zjarreve në ambient të hapur në vend, qoftë me qëllim apo pa qëllim.
“Për parandalimin dhe zbulimin e autorëve dhe pengimin e shkaktimit të zjarreve në ambient të hapur, MPB-ja në mënyrë të përforcuar po paraqitet në terren dhe ka angazhuar mbi 600 nëpunës policorë. Deri tani në shuarjen e zjarreve kanë marrë pjesë nëpunës policorë nga njësitë speciale, ndërsa u angazhua edhe helikopter i MPB-së”, tha Vëçkova.
