Hilary Klinton ka bashkëpunuar me aktorin e çmimit Oskar, Kevin Spacey, për të realizuar një video-parodi për ditëlindjen e 68-të të bashkëshortit të saj, Bill Klinton, më 19 gusht.
Në klipin e shkurtër të krijuar për “Clinton Foundation”, Kevin Spacey (55 vjeç) i telefonon Hilarit nga Zyra Ovale duke imituar me grimasë një pamje të Bill.
Ndërkohë që ai e pyet atë më këmbëngulje se çfarë dhurate do të marrë për ditëlindje, Hilari (66 vjeçe) i jep një përgjigje komike, që i referohet përgjigjes së saj të zakonshme kur e pyesin nëse do të kandidojë për Presidencën e SHBA në vitin 2016: “Ky është një vendim shumë personal, që unë do ta marr kur të jem gati”.
Ideja e Hilarit për të krijuar video-parodinë erdhi pasi bashkëshorti i saj “është i fiksuar pas ekranit” kur transmetohen episodet e “House of Cards”, ku protagonist është Spacey.
