Mbarimi i universitetit sjell një sërë dilemash, qoftë për profesionin, punësimin dhe sigurisht, edhe me zgjedhjen nëse duhet të vijosh të jetosh apo jo me prindërit. Nisur nga kjo dilemë, le të analizojmë përfitimet dhe sfidat e të jetuarit me prindërit.
Përfitimet:
Stabiliteti financiar
Jetesa me prindërit mund të të ofrojë një bazë më të fortë financiare, sidomos gjatë periudhës kur të duhet të kërkosh punë. Kjo, bën që energjitë dhe të ardhurat e tua të jenë pak më të larta dhe në rastin më të mirë, të kursesh për të ardhmen tënde.
Mbështetja emocionale
Prindërit janë gjithnjë gati për të të ndihmuar dhe janë burimi i një mbështetjeje të madhe emocionale, sidomos në këtë fazë të jetës. Prindërit të këshillojnë, të orientojnë drejt zgjedhjeve më të mira dhe shërbejnë si një motivim i mirë gjatë tranzicionit tënd.
Më shumë dije për menaxhimin e të ardhurave
Gjithnjë e ke pyetur veten sesi prindërit ia kanë dalë të të sigurojnë më të mirën, në çdo periudhë? Ata kanë ditur të mbijetojnë me të ardhura minimale dhe janë mëkëmbur edhe në rastet kur kanë lënë një punë apo profesion të caktuar. Epo, jetesa me prindërit, sidomos në periudhën pas mbarimit të universitetit, të mëson metoda të reja kursimi, si dhe investimi të të ardhurave në mënyrë më të zgjuar. Fundja, përvoja e prindërve tregon shumë.
Aspektet negative:
Kufizimi i lirisë
Le ta pranojmë: Jetesa me prindërit të kufizon paksa lirinë, pavarësisht moshës që mund të kesh. Prindërit, shpeshherë ndjekin teorinë “Shtëpia ime, rregullat e mia” dhe kjo sjell edhe konflikte apo ndjesinë se po të limitohet pavarësia në vitet e tua më të mira.
Më pak privatësi
Mami futet në dhomën tënde pa trokitur, babi që thjesht hap derën e tualetit kur ti je duke e përdorur, motra/vëllai që s’e ka fare problem të të marrë bluzën që ti do vishje për të dalë…Nëse këto skenare të duken të njohura dhe të përjetuara, mund të vazhdojnë të ndodhin kur ti jeton me prindërit.
Mendimi se ndoshta s’po bën asgjë me jetën
Shpesh, të rinjtë e krahasojnë veten me të tjerët dhe vënë re arritjet e bashkëmoshatarëve, por jo kushtet në të cilat këta bashkëmoshatarë kanë shkuar drejt suksesit. Ky krahasim dhe jetesa me prindërit mund të sjellë idenë se ndoshta s’ke mundur të krijosh një identitet të pavarur, s’po bën asgjë me jetën tënde, apo e ke të pamundur të krijosh një jetë të lirë dhe të mbështetur në aftësitë e tua. Është mëse në rregull të ndihesh kështu, por mos harro se çdo gjë ka momentin e vet.
Në shumë vende në botë, jetesa me prindërit pas të 20-ave dhe mbarimit të universitetit është mëse e zakonshme dhe aspak një tabu. Këto vende janë:
Japonia – Rreth 48% e të rinjve japonezë vijojnë të jetojnë me prindërit edhe në moshën 30-vjeçare.
Italia - Rreth 64% e të rinjve në Itali jetojnë me prindërit, pas të 20-ave.
Spanja – Sipas studimeve, në Spanjë, rreth 80% e të rinjve jetojnë me prindërit edhe kur janë në moshën 30-vjeçare.
Ndërsa vendet ku të rinjtë largohen nga shtëpia pas moshës 18-vjeçare janë:
SHBA – Rreth 32% e të rinjve në SHBA largohen nga shtëpia e prindërve pas moshës 18-vjeçare.
E njëjta ndodh në Mbretërinë e Bashkuar, ku rreth 48% e të rinjve bëjnë të njëjtën gjë dhe në Kanada, shifra e të rinjve që largohen nga shtëpia e prindërve pas moshës 18-vjeçare, arrin shifrën 42%.
Pra, jetesa me prindërit pas mbarimit të universitetit, ose në të 20-at, ka avantazhe dhe aspekte negative. Një vendim i tillë ndërmerret duke pasur parasysh disa faktorë: të ardhurat ekonimike, kultura, marrëdhënia me familjen, synimet vetjake etj.
