Dita Botërore e Mbrojtjes Civile, festohet çdo 1 Mars në kujtim të hyrjes në fuqi në vitin 1972, të Kushtetutës së Organizatës Botërore të Mbrojtjes Civile.
Kjo ishte si një Organizate Ndërshtetërore me dy qëllime kryesore:
Së pari, sjelljen në vëmendjen e publikut në mbarë botën për rëndësinë vitale që ka mbrojtja civile, rritjen e gatishmërisë për parapërgatitje, parandalim dhe masave mbrojtëse dhe së dyti, si një nderim për të gjithë personelin e shërbimeve kombëtare për përpjekjet, sakrificat dhe përgjegjësitë e tyre për të luftuar kundër fatkeqësive.
Në shumë vende të botës, në këtë datë, bëhen bilancet e punës së kryer nga ky shërbim humanitar në ndihmë të komunitetit të çdo vendi, në lidhje me parandalimin dhe përballimin e fatkeqësive natyrore dhe atyre të shkaktuara nga njeriu.
Kjo datë përmban, në vetvehte, kontributin e të gjithë shoqërisë për bashkëpunimin dhe koordinimin e veprimtarive të strukturave shtetërore dhe vullnetare, në mbrojtjen e jetës individuale dhe kolektive të njerëzve, gjësë së gjallë, pasurisë, institucioneve, trashëgimisë kulturore dhe të mjedisit, kundër pasojave të fatkeqësive natyrore ose fatkeqësive të tjera.
