Serbia ka marrë një tjetër ngarkesë armësh nga Rusia pavarësisht sanksioneve ndërkombëtare të vendosura ndaj Moskës për shkak të pushtimit të Ukrainës.
Presidenti serb Aleksandar Vuçiq prezantoi sot sistemin rus të bllokimit të dronëve të njohur si Repellent.
Ai foli në prag të festës kombëtare, të cilën Serbia e feston sot.
Ngarkesa mbërriti në Serbi disa muaj më parë, edhe pse hapësira ajrore rreth Serbisë është e rrethuar plotësisht nga anëtarët e NATO-s që kanë rënë dakord për sanksione kundër Rusisë.
Serbia është i vetmi vend evropian që nuk pajtohet me sanksionet kundër Rusisë dhe i vetmi vend evropian që ende nënshkruan marrëveshje bashkëpunimi me Rusinë. Bashkimi Evropian tha se, nëse dëshiron të hyjë në BE, Serbia do të duhet të pajtohet me sanksione kundër Rusisë.
Shumica e teknologjisë më të fundit ushtarake serbe vjen nga Rusia. Materialet e tjera vijnë nga Kina si dhe nga disa prodhues evropianë të armëve dhe avionëve.
Shumica e bisedave të Vuçiqit sipas ABCnews për kërcënimet e mundshme i referohen Kosovës, e cila shpalli pavarësinë pasi NATO ndërhyri për të ndaluar një goditje të përgjakshme serbe në 1999.
“Nëse dikush tenton të kryejë agresion kundër Serbisë, siç bëri në vitin 1999, nuk do të mund ta bëjë kështu, do të duhet të sulmojë nga jashtë, nga distanca, nga deti Adriatik apo Mesdhe, me raketa lundrimi. ”, tha Vuçiq.
