Dy serbët e plagosur në fshatin Banjskë të Zveçanit ndodhen në katin e dytë të repartit kirurgjik të Spitalit të Përgjithshëm në Novi Pazar.
Kështu shkruajnë mediat serbe, sipas të cilave, jozyrtarisht mësohet se meshkujt në fjalë janë 26 dhe 29 vjeç.
Njëri ka plagë me armë zjarri në krahë dhe këmbë, ndërsa tjetri është qëlluar në gjoks, por nuk ka plagë nga të shtënat sepse mbrohej me jelek antiplumb.
Siç shkruan më tej, N1info.rs, mediat kanë raportuar të dielën se para repartit kirurgjik të spitalit të Novi Pazarit ka pasur prezencë të dukshme policore.
Spitali i Përgjithshëm në Novi Pazar është institucioni shëndetësor në territorin e Serbisë që është më afër vendit në Kosovë ku ka ndodhur ngjarja.
Lajmi vjen pas zhvillimeve të fundit në veri të Kosovës, përkatësisht sulmit ndaj zyrtarëve të Policisë së Kosovës, nga ku mbeti një polic i vdekur dhe një tjetër i plagosur.
Jo shumë kohë më vonë, anëtarët e grupit që kryen një sulm terrorist, u strehuan në manastirin e Banjskës dhe në konflikt me organet e rendit nga Kosova janë vrarë katër sulmues dhe kanë mbetur disa të tjerë të plagosur.
