Posta e Kosovës lëshoi sot në qarkullim emisionin e ri të pullave postare të titulluar “Fauna – Peshqit (trofta, mustaku dhe ngjala)”.
Sipas njoftimit për medie të Postës, peshqit janë burim i rëndësishëm për njerëzit në mbarë botën, veçanërisht për ushqim, derisa thuhet po ashtu se përmes pullave të reja promovohen para botës pasuritë natyrore që ka Kosova.
“Trofta është peshk i ujërave të ëmbla që jeton në shumicën e lumenjve të Shqipërisë. Trofta gjendet kryesisht në ujëra të ftohta dhe të kthjellëta me temperatura 10-16 °C dhe jeton në shumicën e lumenjve dhe liqeneve të Amerikës së Veriut, Azisë veriore dhe Evropës. Mustaku, që në këtë emision është prezantuar me dy pamje, është peshk mjaft i madh grabitqar që preferon të jetojë në lumenj dhe liqene me ujë të freskët. Mustaku është një përfaqësues i shquar i klasës së peshqve me rreze, rendi i mustakëve, familjes së mustakëve.
Trupi mjaft i fortë i këtij peshku është i mbuluar me një shtresë të trashë mukusi, e cila i siguron grabitqarit lëvizje të shkëlqyera në ujë. Koka është e gjerë dhe e trashë me sy relativisht të vegjël. Goja është gjithashtu e gjerë me një grup dhëmbësh, megjithëse të vegjël, por të shumtë. Ngjala është peshk i ujërave të ëmbla që jeton në shumicën e lumenjve dhe liqeneve të Shqipërisë dhe është i përhapur pothuajse në të gjithë lumenjtë dhe liqenet e Evropës ”, thuhet tutje në njoftim.
