Policia e Sarandës ka gjetur mbrëmjen e kësaj të premteje rreth 13 KG lëndë plasëse të llojit "tritol" në një sipërfaqe toke pa pronar.
Zbulimi është bërë në lagjen numër 4 të qytetit të ekstremit jugor, e njohur ndryshe si “Baba Rexhepi”.
Në një sipërfaqe toke të gërmuar është gjetur një sasi lënde plasëse me peshë totale prej 12.9 kilogramë, e gjitha e mbuluar me një rrobë ngjyrë kafe.
Autoritetet policore lokale saktësojnë se, lënda shpërthyese është e llojit tritol dhe ishte ndarë në 63 kallëpe, me peshë 200 gramë secila.
Edhe pse nga hetimet paraprake ka rezultuar se kjo sasi eksplozivi është gjetur në një tokë pa pronarë, po punohet për zbulimin dhe kapjen e poseduesve.
