Policia në Gjermani ka nisur hetimin e vdekjes së dy grave, që sipas tyre dyshohen të jenë viktima të një çifti, që i kishte marrë peng ato dhe i kishte torturuar.
Ngjarja ka ndodhur pas publikimeve online për lidhje nga një burrë dhe ish-gruaja e tij, duke joshur në këtë mënyrë gratë të shkonin në shtëpinë e çiftit.
Të dyshuarit, 46-vjeçari Wilfried W. dhe 47-vjeçarja Angelika B., u arrestuan të mërkurën e kaluar dhe akuzohen për vrasje me paramendim. Megjithatë, burri mohon të ketë kryer vepër penale, por ish-bashkëshortja e tij raportohet të jetë rrëfyer për drejtësinë.
Hetuesit gjermanë besojnë se mund të ketë edhe viktima të tjerë, ndaj dhe kanë nisur kërkimet në shtëpinë e çiftit në Hoexter, në Veriperëndim të Gjermanisë. Policia ka qenë prej javësh në hetim të një tjetër vdekjeje, asaj të 41-vjeçares të njohur si Susanne F., që sipas tyre mund të jetë marrë sërish peng dhe torturuar në shtëpinë e çiftit vrasës. Por ndryshe nga viktimat e para, kjo e fundit ndërroi jetë në spital muajin e kaluar, pasi çifti besohet të jetë përpjekur ta dërgonte atë në shtëpinë e saj për të humbur gjurmët.
Gjatë konferencës për shtyp të së martës, policia tha se – sipas tyre, – çifti në fjalë ka vrarë dhe gjymtuar një tjetër grua të re në moshë, përpara se të shkrumbonin trupin e pajetë në oxhakun e shtëpisë së tyre.
Annika W., 33-vjeçare nga Saksonia e Poshtme, ndërroi jetë në gusht të vitit 2014. Ashtu si Suzanne F., ajo besohet t’i jetë përgjigjur një kërkese “online” për lidhje në fund të vitit 2013.