Një 31-vjeçar është arrestuar në ambientet e Spitalit Ushtarak në Laprakë, Tiranë. Sipas policisë, shtetasi Ylli Troci ka mashtruar shtetasen me iniciale N. G., 57 vjeçe, lindur dhe banuese në Kukës.
31-vjeçari i ka dhënë N.G., një shumë prej 150 eurosh të falsifikuara me justifikimin se i duheshin para shqiptare për mjekët. Kështu, 57-vjeçarja i ka dhënë në këmbim të 150 eurove shumën prej 25.000 lekësh të reja.
Në momentin që Troci është larguar nga ambientet e spitalit, 57-vjeçarja ka konstatuar se paratë ishin të falsifikuara dhe është paraqitur për kallëzim pranë Seksionit për Krimin Ekonomik në Drejtorinë e Tiranës.
Policia ka nisur punën për verifikim e ngjarjes dhe pas kryerjes së veprimeve hetimore, ka bërë të mundur identifikimin e autorit.
Sipas policisë, nga veprimet e kryera është bërë dokumentimi i disa veprave penale të dyshuara se janë kryer nga ky shtetas. Policia bën me dije se rezultojnë edhe 14 ngjarje të të njëjtës formë mashtrimi.
