Është sulmuar për vdekje trajneri i ekipit të futbollit australian, "Adelaide Crows". Sipas policisë australiane, Phil Walsh është sulmuar disa herë me thikë, e cila u gjet në vendin e ngjarjes.
Pas një debati në shtëpinë e trajnerit australian, agjentët e policisë kanë mbërritur në vendngjarje ku kanë gjetur të plagosur rëndë 55-vjeçarin. Ata i kanë dhanë mjekimet e para por ai ndërroi jetë për shkak të plagëve të marra. Ndërsa, bashkëshortja e Walsh, Meredith u shoqërua për në spital pasi kishte marrë disa plagë të lehta.
“Ne ju kërkojmë të respektoni privatësinë e familjes së tij, si dhe të lojtarëve, trajnerëve dhe stafit tonë në këto momente shumë të vështira. Ne ndihemi të shkatërruar nga humbja e trajnerit”, thuhet në deklaratën e drejtuesve të klubit.
Ndërkohë, i biri 26-vjeçar i trajnerit është arrestuar dhe është akuzuar për vrasjen.
Futbolli tipik australian është i ngjashëm me atë amerikan, ndonëse nuk ka të njëjtat përmasa. Vetë Walsh kishte qenë më parë futbollist, duke luajtur për klube të ndryshme përpara se të fillonte karrierën si trajner.
