Policia ka arrestuar dy persona si të dyshuar për atentatin ndaj 48-vjeçarit, Krenar Hasanaliaj, të ndodhur mbrëmë rreth orës 19:00 në zonën e quajtur “Unaza e Re”.
Dyshohet se, Florenc Qepuri dhe Xhemal Adushaj janë paguar për të vrarë Kreanr Hasanaliajn. Qepuri u arrestua pa orë pas ngjarjes ku gjatë operacionit i riu nga Shkoda shkëmbeu zjarr me policinë, ndërsa Adushaj u kap sot në shtëpinë e tij në Domje.
Një ditë pas atentati, 48-vjeçari ka dalë nga gjendja kritike dhe tashmë nuk paraqet rrezik për jetën.
Dy atentatorët po lëviznin me motor, tip "Scooter" me targa NKP 467, kanë qëlluar 4 herë me armë zjarri pistoletë në drejtim të Hasanaliajt.
"A1 Report" sjell pamjet ekskluzive të momentit të zbulimit të motorit të atentatorëve, i braktisur në liqenin e Kasharit.
Nga hetimet e para bëhet e ditur se pista kryesore ku po hetohet është ajo e larjeve të hesapeve pasi, 48-vjeçari i plagosur, akuzohet për vrasjen e dy personave, vjedhje me dhunë, si dhe falsifikim dokumentesh.
Hasanaliaj, lindur në Sherisht dhe banues në Vlorë, me gjeneralitete të ndryshuara në Krenar Habilaj, dyshohet të ketë qenë autor i vjedhjes me pasojë vdekjen e shtetasit Valter Kofina, ndodhur në fshatin Sherisht në prill 1997.
Gjithashtu ka qenë i dyshuar për vrasjen e Dushan Shahaj, nga Lubonja, ngjarje e ndodhur në maj 1999 në Sherisht për motive të dobëta. Është dënuar me 11 vjet burg dhe 6 milion lekë gjobë në shtator 2008 për "Vjedhje me armë", dhe falsifikim dokumentash (pasaportë).
Gjithashtu është dënuar edhe me 5 vjet burg për “Shkelje të rregullave të qarkullimit rrugor” pasi ka aksidentuar me pasojë vdekjen e dy personave, të familjes Velë në fshatin Dukat të Vlorës.