Policia e Gjirokastrës ka sekuestruar të premten në pikën kufitare të Kakavijës një sasi lënde narkotike prej 10 kilogramë heroinë dhe 7 kilogramë hashash, si dhe një armë automatike.
Lajmin e bëjnë të ditur burime policore lokale, sipas të cilave droga dhe arma e tipit kallashnikov ishin duke u transportuar nga një shtetas grek që synonte të kalonte kufirin për në vendin fqinj.
Sipas burimeve, ndalimi është bërë në orën 1 pas mesnate, gjatë kontrollit në vijën e dytë në dalje për në shtetin grek, saktësojnë burimet.
Në automjetin tip fuoristradë “Benz Mercedes”, pronë e shtetasit Charilaos Kontekakis, agjentët kanë konstatuar praninë e disa pakove të dyshimta në sediljet e pasme.
Menjëherë janë njoftuar efektivët e sektorit të anti-drogës në Drejtorinë e Policisë së Gjirokastrës, të cilët me të mbërritur në vendin e ngjarjes kanë kryer një kontroll të imtësishëm të mjetit.
Për pasojë, shtetasit grek i janë vënë prangat, ndërsa lënda narkotike, arma e zjarrit dhe municionet janë sekuestruar në cilësinë e provës materiale.
