Qyteti bregdetar i Durrësit është zgjuar i shokuar këtë mëngjes nga një krim i pazakontë. Dy të moshuara, kunata me njëra-tjetrën, janë vrarë në mënyrë mizore në banesën e tyre: të mbytura me qese plastmasi dhe me duart e lidhura me litar.
Krimi tronditës ndodhi pas mesnate në lagjen numër 11, teksa Elsa Vava 72 vjeç dhe Gjinovefa Vava 77 vjeç janë gjetur të pajeta në banesën 2-katëshe mëngjesin e kësaj të Marte. Autorët e vrasjes së dyfishtë, të cilët dyshohet se kanë hyrë në banesë duke kapërcyer murin rrethues ende nuk janë zbuluar, ashtu sikurse rrethanat e krimit mbeten ende të paqarta.
Sakaq, në shtëpinë e dy të moshuarave që humbën jetën, ndodhej dhe një tjetër e moshuar e cila fatmirësisht nuk është dhunuar nga grabitësit, ndërsa mësohet se ishte e paralizuar. Ajo është motra e një prej të moshuarave që mbeti e vrarë, ndërsa mësohet se nuk është në gjendje për të folur në lidhje me cfarë ndodhi në banesë.
I afermi i viktimave: Ishin familje e respektuar, te moshuarat ndihmoheshin financiarisht nga femijet
Kiço Simaku, krushku i 77-vjeçares Gjinofeva Vava tregon për mikrofonin e A1 REPORT se si i njihte të ndjerat. Zonjat i përksinin dy prej familjeve më të njohura dhe të respektuara në qytetin bregdetar të Durrësit, thotë ai, ndërsa shton se asnjëherë nuk kanë pasur probleme.
Ato jetonin të vetme prej vitesh, por kishin mbështetjen financiare të fëmijëve që jetonin shumë pranë banesës së tyre. Madje kishin pajtuar edhe një punëtore për të moshuarën e cila ishte e paralizuar.
“Këto janë tre gra të trija të moshuara. Njëra prej tyre është e shoqja e ish-arsimtarit të dalluar të Durrësit Jani Vava. Ka punuar si llogaritare në Uzinën mekanike, ka qenë një grua e nderuar. Tjetra, Gjenovefi është motra e Janit e cila edhe ajo ka qenë punëtore. Kanë edhe një motër që e kanë të sëmurë dhe banon bashkë me to, të trija janë me pension. Gjithmonë kanë parë punën e tyre dhe nuk i kanë rënë kurrkujt në qafë. Kanë një vajzë dhe një djalë të martuar. Fëmijët jetonin më vete në një shtëpi më poshtë. Kanë pasur një grua që i ndihmonte për motrën që është sëmurë dhe që e paguanin. Është ajo proverba e vjetër që paratë dhe gjynahet nuk tregohen, kështu që nuk kam ditur të kenë para të tjera mënjanë përveç lekëve që i mbeteshin nga pensionet”, shprehet për A1 REPORT, i afërmi i viktimave Kiço Simaku.
Flasim komshinjtë: Ngjarje makabre, autorët të vihen para drejtësisë
Komshinj të të moshuarave janë shprehur të shokuar për krimin e rëndë. Për mikrofonin e A1 REPORT ata bëjnë apel që autorët e masakrës të vihen para drejtësisë.
“Të gjithë i njihnim për gra të nderuara në lagje, ato ishin në pension dhe ishin shumë të sjellshme, thotë një fqinj i tyre.
Sakaq, një tjetër shprehet: “Jemi të shokuar nga kjo tragjedi e rëndë, pasi ato zonja nuk e meritonin kurrsesi një fat të tillë”.
“Uroj që autorët e kësaj masakre të identifikohen dhe të vendosen para drejtësisë dhe të marrin dënimin maksimal”, thotë një tjetër komshi i të moshuarave.
Të moshuarat jetonin shumë pranë të afërmve të tyre. Ishte djali i 72-vjeçares Elsa Vava ai që ka shkuar në banesë dhe ka parë të pajeta nënën e tij dhe nusen e vëllait të të moshuarës.
Policia e Durrësit: Janë shoqëruar 16 persona
Ora 11:10 Policia e Durrësit ka dhënë përmes një njoftimi zyrtar informacionet paraprake për vrasjen e të moshuarave. Deri pak para mesditës janë shoqëruar 16 persona, të cilët dyshohet të kenë dijeni mbi rrethanat e krimit, si komshinj, të afërm apo edhe persona me precedentë në fushën e vjedhjeve me dhunë dhe përdorimit të narkotikëve.
“Veprimet hetimore po drejtohen nga Prokurori i Rrethit. Nga Drejtoria e Përgjithshme e Policisë Shtetit janë dërguar specialistë të hetimit të krimeve të rënda dhe veprimet po ndiqen nga strukturat e Drejtorisë së Policisë Qarkut në funksion të zbardhjes së ngjarjes dhe motiveve e rrethanave të saj”, njofton Policia e Durrësit.
