Një aksident i rrallë ka ndodhur mesditën e sotme në qytetin e Librazhdit, ku dy biçikleta janë përplasur me njëra-tjetrën dhe si pasojë ka mbetur i vdekur në vend një 39-vjeçar.
Viktima Bashkim Shkurti ka ndërruar jetë menjëherë pasi ra me kokë nga biçikleta me të cilën ai po udhëtonte, teksa u përplas nga biçikleta tjetër që drejtohej nga Edmond Brahja.
Menjëherë pas ngjarjes, efektivët e Librazhdit kanë arrestuar 23-vjeçarin Edmond Brahja, banues në fshatin Dorëz, i cili po ashtu ka mbetur i lënduar nga kjo përplasje.
Ngjarja ka ndodhur në fshatin Rrapun të Librazhdit, ku ka mbetur i lënduar gjithashtu edhe një 27-vjeçar me inicialet S.A. i cili ishte pasagjer në biçikletën që drejtohej nga Brahja.
Policia e Librazhdit njofton se materialet i kanë kaluar Prokurorisë së Rrethit Gjyqësor të Elbasanit për veprimet e mëtejshme për veprën penale “Shkelje e rregullave të qarkullimit rrugor”.
