Posedimi i armëve ilegale është një dukuri shqetësuese në vendin tonë, pasi që Policia vazhdimisht has në persona të armatosur të cilët cenojnë sigurinë e qytetarëve dhe rrezikojnë jetën e tyre. Të rinjtë, duke përfshirë edhe ata të moshës së mitur, kapen goxha shpesh me armë të ftohta e mjete të tjera, qoftë në institucione arsimore, apo edhe në hapësira të tjera.
Një rast i tillë është zbuluar dje pasdite në Ferizaj, ku një njësi policore që po patrullonte në rrugën “Ramadan Rexhepi” ka ndalur për kontroll një person.
Pas kontrollit policor, te i dyshuari i moshës 17-vjeçare, është gjetur dhe sekuestruar një mjet i mprehtë (thikë) dhe disa gëzhoja.
Për pasojë, i dyshuari është shoqëruar në stacion policor, ku gjatë intervistimit ka pranuar se thika është e tij.
Pas përfundimit të procedurave policore, Prokurori i Shtetit ka urdhëruar që ndaj të dyshuarit të iniciohet rasti për veprën penale ‘Mbajtje në pronësi, kontroll ose posedim të paautorizuar të armës’.