Dëshmitari M.J, ka thënë se tokën e blerë nga i akuzuari Muharrem Kadriu, e ka blerë duke i ndjekur të gjitha procedurat ligjore në Gjykatën Themelore në Prishtinë dhe se e njëjta ka qenë e regjistruar në Zyrën Kadastrale në Prishtinë.
Këtë deklarim, dëshmitari M.J, e bëri të premten në Gjykatën Themelore në Prishtinë, Departamentin Special.
Në këtë rast, Baki Abdullahu, Haki Hyseni, Arsim Hasani, Valdet Shaqiri, Skender Potera, Muharrem Kadriu, Xhevahir Begolli, Nadir Shantir, Sali Bivolaku, Idriz Buza, Shkëlqim Latifaj, Enver Çoçaj, Jeton Govori, Besnik Rexha, Jusuf Lataj dhe Agron Haxhosaj akuzohen se kanë përvetësuar dhe kanë tentuar të transferojnë parcelat në pronësi shoqërore që ndodheshin në Llapnasellë e Veternik, me qëllim të fshehjes apo maskimit të natyrës, burimit, sistemimit, lëvizjes dhe pronësisë së pronave.
“Që nga viti 2012 jam pronar i kësaj pacele për të cilën mendoj se e kam blerë në mënyrë ligjore, nga shitësi Muharrem Kadriu, në prani të avokatit të autorizuar nga vetë shitësi, avokatit Avni Maxhuni dhe të gjitha këto procedura ligjore, janë të kryera pranë Gjykatës Themelore në Prishitnë e edhe sot e posedoj të njetën pronë. Nuk kam asnjë problem lidhur me posedimin e pronës dhe pagesat janë kryher përmes bankës”, ka thënë dëshmitari, raporton “Betimi për Drejtësi”.
Në pyetjet e prokurores speciale Iliriana Çollaku-Tafa, dëshmitari M.J, ka deklaruar se pronën e ka blerë nga Kadriu, në vlerë prej 450 mijë euro, ku fillimisht i ka dhuruar një veturë “Mercedes” në vlerë prej 45 mijë euro dhe i ka bërë pagesë prej 5 mijë euro, ndërsa pagesën e dytë e ka bërë më pas në vlerë prej 400 mijë euro.
I njëjti tha se nuk ka qenë i interesuar lidhur me pronarin e mëparshëm të kësaj prone.
“Jo nuk jam interesuar fare, pasi që i kom besu fletës poseduese, pagesat i kam kryer në mënyrë ligjore, s’ka qenë detyrë e imja ta vërtetoj një gjë të tillë”, ka shtuar dësmitari M.J.
Tutje, ai tha se nuk mundet të etiketojë njerëz nga kush është dëmtuar, pasi që ky është problem zinxhiror që sipas tij i ka sjellë deri tek kjo çështje e palakmueshme për të gjithë.
Ndërsa, për këtë problem me këto toka thotë se ka dëgjuar për herë të parë në ftesën e EULEX-it.
Dëshmitari M.J është raportuar me iniciale, me kërkesë të kryetares së trupit gjykues, Violeta Namani.
Në këtë seancë, është dëgjuar edhe dëshmitari Faton Ramadani, i cili ka thënë se deklarata e tij e dhënë në EULEX, ka pasur lidhje më një çështje tjetër.
Andaj, pasi që ky dëshmitar ka qenë jorelevant për këtë çëshje, nuk ka pasur pyetje as trupi gjykues e as mrojtësit e të akuzuarve.
Po ashtu, është dëgjuar edhe dëshmitari Naser Abazi, i cili ka deklaruar se qëndorn pranë deklaratës së dhënë në hetuesinë e EULEX-it.
Me propozimin e prokurores Çollaku-Tafa janë kosnideruar të lexuara deklaratat e dëshmiatrëve Shiqeri Spahiu dhe Januz Mustafa, të cilët kanë pasur të dëgjohen në këtë seancë, mirëpo nuk kanë qenë prezent dhe është konsideruar e lexuar edhe deklarata e Bratislav Stojanoviq.
Prokurorja ka propozuar dëgjimin e të akuzuarve Avni Maxhuni, Arton Vila dhe Eduard Gashi në cilësinë e dëshmitarëve, si dhe ka kërkuar nga gjykata që ta vërtetojë se a jetojnë ende dëshmiarët Dobrila Pantiq dhe Driton Hajdari.
Propozimet e lartcekura janë aprovuar nga kryetarja e trupit gjykues Violeta Namani.
Seancat e radhës pritet të mbahen më 31 tetor, 1 dhe 2 nëntor 2022.
Në këtë rast, i akuzuar është edhe Samir Haxhimusaj, për të cilin, kryetarja e trupit gjykues Violeta Namani, në seancën e 31 majit 2021 ka bërë veçimin e procedurës, pasi ka konstatuar se i njëjti gjendet jashtë vendit.
Gjykata Themelore në Prishtinë më 1 shtator 2021, e kishte hudhur poshtë aktakuzën e Prokurorisë Speciale të Republikës së Kosovës (PSRK).
Kundër këtij aktvendimi, ankesë kishte ushtruar PRSK-ja, për shkak të shkeljeve esenciale të dispozitave të procedurës, shkeljes së ligjit penal si dhe vërtetim jo i plotë dhe i gabuar i gjendjes faktike.
Me këtë ankesë, prokuroria ka kërkuar që të ndryshohet vendimi i shkallës së parë dhe të vendoset që të vazhdohet procedura penale ndaj të akuzuarve ose rasti të kthehet në rivendosje.
Gjykata e Apelit ka marrë vendim, me të cilin e ka ndryshuar vendimin e shkallës së parë dhe ka vendosur që lënda ndaj 16 të akuzuarve për shpëlarje të parasë, të shkojë në shqyrtim gjyqësor.
Gjykata e Apelit ka vlerësuar se aktvendimi i ankimuar është i përfshirë në shkelje esenciale të dispozitave të procedurës, po ashtu dispozitivi i aktvendimit është i paqartë dhe i pakuptueshëm.
Po ashtu, Apeli ka vlerësuar se në arsyetimin e aktvendimit të ankimuar nuk janë dhënë arsye të mjaftueshme dhe të qarta lidhur me faktet vendimtare, të cilat i ka vërtetuar apo nuk i ka vërtetuar, si dhe është në kundërshtim me shkresat e lëndës si dhe arsyet në të cilat është bazuar në rastin e zgjedhjes së kësaj çështje.
Ndryshe, Prokuroria Speciale e Republikës së Kosovës, më 24 tetor 2016 ka ngritur aktakuzë ndaj Baki Abdullahut, Haki Hysenit, Arsim Hasanit, Valdet Shaqirit, Skender Poterës, Muharrem Kadriut, Xhevahir Begollit, Nadir Shantirit, Sali Bivolakut, Idriz Buzës, Samir Haxhimusajt, Shkëlqim Latifajt, Enver Çoçajt, Jeton Govorit, Besnik Rexhës, Jusuf Latajt dhe Agron Haxhosajt, për shkak të veprës penale “Shpëlarja e parave”, vepra penale në bashkim dhe në vazhdim, në bashkëkryerje, në kundërshtim me nenin 23 dhe 71 të KPRK-së në fuqi deri më 31 dhjetor 2012, po ashtu paraparë edhe me nenin 31 dhe 81 të KPRK-së, në fuqi që prej janarit 2013; në kundërshtim me nenin 10 të Rregullores së UNMIK-ut nr.2004/2 “Për parandalimin e pastrimit të parave dhe veprave penale të përafërta dhe në kundërshtim me nenin 56 të Ligjit për parandalimin e pastrimit të parave dhe luftimin e financimit të terrorizmit”, në fuqi prej 15 qershor 2016, siç referohet me nenin 308 të KPRK-së, të hyrë në fuqi nga 1 janari 2013.
Sipas kësaj aktakuze, të lartcekurit këto veprime i bëjnë duke e ditur apo duke pasur arsye për ta ditur se parcelat e tokës në pronësi shoqërore të cekura më poshtë janë fitim i krijuar me aktivitete kriminale, posaçërisht se pronësia e këtyre pronave ishte transferuar zyrtarisht tek persona të entitetit serb.
PSRK-ja pretendonte se këto prona kanë qenë në fakt nën kontrollin dhe posedimin e grupit të organizuar kriminal të përshkruar në pikën një të aktakuzës, si rezultat i veprimtarive kriminale të përshkruara në pikat nga 1 deri në 19, në bashkëpunim me të paraqiturit si përfaqësues të shitësit të parcelës së tokës dhe me vet blerësin që janë vet ata, kanë transferuar dhe kanë tentuar të transferojnë pronat me qëllim të fshehjes apo maskimit të natyrës, burimit, sistemimit, lëvizjes dhe pronësisë së pronave, apo në çfarëdo rrethanash.
Kjo thuhet se u bë me qëllim të asistimit të të akuzuarve tjerë të cilët ishin të përfshirë apo kishin qëllimin e përfshirjes në kryerjen e veprës penale, që ka shkaktuar shmangien nga pasojat juridike ose pasojat e mundshme ligjore, për veprimet e tyre, në veçanti.
Gjithnjë sipas kësaj aktakuze, Baki Abdullahu më 24 maj 2006 ka përvetësuar dy parcela të tokës në Llapnasellë nga Edvard Gashi, i cili kishte vepruar në cilësi të përfaqësuesit dhe në emër të anëtarëve të familjes Stevic, me çmime artificialisht të ulëta, 82 mijë euro (20.83 euro për m2) dhe më 18 tetor 2006 i ka transferuar ato nga Haki Hyseni për një çmim prej 80 mijë euro (20.29 euro për m2).
Haki Hyseni thuhet se më 18 tetor 2006 ka transferuar parcelat e tokës në Llapnasellë nga Haki Abdullahu, me çmim të ulët prej 82 mijë euro. Kurse, Arsim Hasani thuhet se më 5 shtator 2006 ka përvetësuar parcelën në Llapnasellë nga Fahredin Gashi, me një çmim të ulët prej 49 mijë e 560 euro (28 euro për m2).
Sipas aktakuzës, Valdet Shaqiri thuhet se më 9 korrik 2007 ka përvetësuar parcelën në Llapnasellë nga Shaban Syla, i cili kishte vepruar në cilësi të përfaqësuesit dhe në emër të Kruna Blagojeviq, në çmim të ulët prej 127 mijë e 400 euro (25 m2) dhe më 30 tetor 2007, ka transferuar këtë parcelë tek Skender Potera, në çmim prej 153 mijë euro (30 për m2).
Gjithnjë sipas aktakuzës, Skender Potera e ka përvetësuar parcelën e lartcekur nga Valdet Shaqiri në çmim prej 153 mijë euro (30 m2). Ndërsa, Muharrem Kadriu thuhet se më 11 shtator 2007 ka përvetësuar parcelën nga Shaban Syla, i cili kishte vepruar në cilësi të përfaqësuesit dhe në emër të Kruna Blagojevic, në çmim të ulët prej 156 mijë e 750 euro (28.65 euro për m2), dhe më 16 mars 2013 këtë parcelë ai e ka transferuar tek ndërmarrja Jusaj Metal për një çmim të ulët prej 405 mijë euro (74 m2).
Aktakuza thotë se Xhevahir Begolli më 29 qershor 2007 ka përvetësuar parcelën e lartcekur nga Shaban Syla , i cili kishte vepruar në cilësi të përfaqësuesit dhe në emër të Kruna Blagojevic në çmim artificialisht të ulët prej 51 mijë e 700 euro (14.96 euro për m2) dhe më 8 mars 2008 të njëjtën e ka transferuar Nadir Shantir në çmim artificialisht të ulët prej 51 mijë e 855 euro (15 m2). E ky i fundit më 8 mars 2008 nga Xhevahir Begolli kishte përvetësuar parcelën e lartpërmendur.
Sali Bivolaku, sipas aktakuzës më 2 korrik 2012 përmes përfaqësuesit të tij, Avni Maxhunit ka përvetësuar parcelën e tokës në Veternik nga Shqipe Maxhuni në çmim artificialisht të ulët prej 150 mijë euro (55.56 m2). Kurse, Idriz Buza thuhet se më 14 gusht 2012 ka përvetësuar parcelën në Veternik nga Elhame Uka në çmim artificialisht të ulët prej 9 mijë euro (3.33 euro për m2).
Aktakuza thotë se Samir Haxhimusaj më 13 shtator 2012 ka përvetësuar parcelën e tokës në Veternik nga Visar Ahmeti në çmim artificialisht të ulët prej 9 mijë e 800 euro (9.80 euro për m2), kurse Shkëlqim Latifaj thuhet se më 16 nëntor 2012 ka përvetësuar parcelën e tokës në Veternik nga Ilaz Syla në çmim artificialisht të të ulët prej 60 mijë euro (38.96 euro për m2), dhe më 25 qershor 2013 e ka transferuar tek Enver Çoçaj në çmimin artificialisht të ulët prej 61 mijë euro (39.61 euro për m2).
Kurse, për Enver Çoçajn aktakuza thotë se më 24 gusht 2012 ka përvetësuar parcelën e tokës nga Ilaz Syla në çmim artificialisht të ulët prej 9 mijë e 900 euro (2.48 euro për m2), dhe më 16 nëntor 2012 ka përvetësuar parcelën tjetër të tokës në Veternik nga Shkëlqim Latifaj në çmimin prej 61 mijë euro (39.61 euro për m2), të cilën më 7 maj 2015 e ka transferuar tek Jusuf Latifaj dhe Agron Haxhosaj në çmim të ulët prej 72 mijë euro (46.75 euro për m2).
Tutje, Jeton Govori thuhet se më 31 tetor 2012 ka marrë autorizimin nga Ilaz Syla për të vepruar në emrin e tij në çështjet që ndërlidhen me parcelën me nr. 1870/10, dhe më 8 janar 2013 ka lidhur një marrëveshje me Ilaz Sylën dhe ndërmarrjen e tij “Ndërmarrja e re Komoran”, nëpërmjet të cilës i është miratuar e drejta pronësore mbi parcelën e tokës 1870/18 në Veternik, e më 4 mars 2013, duke përfaqësuar “Ndërmarrjen e re Komoran” ai ka transferuar parcelën e lartcekur tek Besnik Rexha me një çmim artificialisht të ulët prej 60 mijë euro (60 euro për m2), me sa duket duke paguar me mjetin motorik BMË X6, në vend të parave.
Në aktakuzë thuhet se Besnik Rexha më 4 mars 2013 ka përvetësuar nga Jeton Govori parcelën e lartcekur. Kurse, Jusuf Lataj dhe Agron Haxhosaj thuhet se më 7 maj 2015 kanë përvetësuar parcelën e tokës në Veternik nga Enver Çoçaj në çmim artificialisht të ulët prej 72 mijë euro (46.75 euro për m2).
