Trajneri i Brighton, Roberto De Zerbi, ka lënë të kuptohet se do të qëndrojë në klub përtej këtij sezoni, pavarësisht nga spekulimet në media rreth të ardhmes së tij. Italiani është kandidat kryesor për postin drejtues të Bayern Munich në Gjermani apo të Liverpool në Angli.
De Zerbi hodhi dyshime mbi të ardhmen e tij në Brighton javën e kaluar, duke refuzuar të angazhohet me “pulëbardhat” për sezonin e ardhshëm. Ai zbuloi se dëshiron të ketë bisedime me pronarin e klubit Tony Bloom për hapat e tij të ardhshëm para se të vendosë se çfarë të bëjë.
Por, pas barazimit pa gola të së mërkurës në Brentford, De Zerbi foli për dëshirën për të mbajtur sulmuesin Joao Pedro sezonin e ardhshëm. Më tej, ai lavdëroi shefin ekzekutiv të Brighton, Paul Barber, i cili zgjati kontratën e tij deri në vitin 2030. De Zerbi rishikoi gjithashtu komentet që bëri rreth të ardhmes së tij pak ditë më parë.
Ai tha: “Ambicia ime është e njëjtë me lojtarët e mi dhe tifozët e mi. Kur them diçka ndryshe, ndoshta diçka më të fortë, është që Brighton të shtyjë më fort në fushë. Klubi im duhet të më japë diçka më shumë çdo sezon. Merkato e verës duhet shfrytëzuar për të punuar më mirë në aspektin organizativ”, tha De Zerbi.
“Unë gjithmonë dua të them mendimin tim për të luftuar apo për të arritur diçka tjetër. Klubi është më i rëndësishëm se trajnerët dhe këtë e di shumë mirë.
Nëse mendoj vetëm për veten time klubi nuk mund të përmirësohet, unë dua të jem i rëndësishëm për klubin tim. Unë gjithmonë punoj kështu dhe askush nuk mund të ndryshojë stilin tim të punës”, tha De Zerbi.
