Qyteti i Ferizajt është nikoqir i derbit të dytë brenda 24 orëve në Ligën e Parë, ku të premten Dinamo u mposht 1-2 nga Suhareka.
E të shtunën me fillim nga ora 15:00 Ferizaj është nikoqir i Prishtinës së Re, në një ndeshje që pritet të mbledh mijëra tifozë.
Aktualisht Ferizaj është në pozitën e parë në tabelë me 44 pikë, një më shumë se Prishtina e Re që mbanë pozitën e dytë.
Ferizajasit kanë 10 fitore radhazi dhe kërkojnë të 11-tën nën urdhrat e trajnerit Arsim Abazi.
Burime të Gazetës Olle brenda klubit ferizajas konfirmojnë se për këtë duel ka një premio të ‘çmendur’ për futbollistët në rast fitoreje.
Presidenti i klubit, Lulzim Abazi ka bërë gati 20 mijë euro për futbollistët e tij nëse fitojnë derbin ndaj Prishtinës së Re.
Është një premio jashtëzakonisht e lartë për Ligën e Parë dhe kjo edhe njëherë dëshmon se Ferizaj është një klub shumë mirë i organizuar dhe me buxhet të shëndoshë duke i qëndruar gjithmonë afër futbollistëve të tyre.
