Presidenti i Federatës Shqiptare të Futbollit, Armand Duka, vizitën e tij të parë si zv/President i UEFA-s ka vendosur ta bëjë në Kosovë, te presidenti i FFK-së, Agim Ademi.
Me këtë rast, Duka premtoi se edhe në pozitën e tij të re do të vazhdojë të përkrahë fuqishëm FFK-në dhe presidentin Ademi. Ai tha se kujdesi i tij do të jetë gjithmonë për Kosovën dhe komunitetin e futbollit kosovar, pasi siç theksoi, ne jemi pjesë e njëri-tjetrit dhe si dy federata do të kemi rëndësi më të madhe në UEFA.
Ai po ashtu theksoi se si mbikqyrës i Federatës së Futbollit të Kosovës në kuadër të UEFA-s, do të shtyjë përpara projektet dhe zhvillimin e mëtejmë të futbollit të Kosovës, teksa përgëzoi presidentin Ademi për ngritjen e kampionatit vendor në të gjitha aspektet, si dhe lavdëroi paraqitjen e mirë të kampionit të Kosovës, FC Ballkani në garat evropiane, që po e përfaqëson denjësisht futbollin mbarëkombëtar.
Ademi bashkë me presidentin Duka vizituan edhe selinë e tifo-grupit të Kombëtares “Dardanët”, teksa më pas kreu i FFK-së shtroi edhe darkë për mikun e tij dhe e falënderoi atë për përkrahjen e vazhdueshme, si dhe e uroi edhe një herë për pozitën e re dhe tejet të rëndësishme në qeverisjen e futbollit evropian.
