Dokumentari i ri “Beckham” po publikohet në Netflix, me fokus jetën e ish-futbollistit anglez. Mes fushës dhe thashethemeve nuk mungojnë zbulimet për jetën private të ish-lojtarit të Manchester United.
Në serialin e publikuar të mërkurën, histori të shumta “prapa skene” të jetës së Beckham dhe gruas së tij Victoria Adams kanë dalë në dritë. Kjo e fundit, në episodin e dytë të serialit, do të zbulojë problemin e depresionit që kaloi burri i saj pas Botërorit 1998.
Dëbimi me karton të kuq gjatë Kupës së Botës në Francë, zbulon Victoria, e la Beckham “të dëshpëruar klinikisht”: “Ai u shkatërrua absolutisht, ishte copë-copë. David ishte vërtet i dëshpëruar, absolutisht në depresion klinik. Më bëri kaq keq, unë ende dua t’i vras këta njerëz”.
Në fakt, Beckham u kritikua ashpër për atë karton të kuq. Një pijetore vendosi një imazh të tij jashtë klubit dhe, me rastin e ndeshjes së parë jashtë fushe të Manchester United sezonin e ardhshëm, autobusi i ekipit u godit me gurë dhe gota birre.
Beckham gjithashtu i kujton ato momente: “Do të doja të kishte një pilulë që mund ta pija dhe të mund të fshija disa kujtime. Bëra një gabim prej budallai, i cili më ndryshoi jetën.
Ishim në Amerikë, do të kishim fëmijën tonë të parë dhe mendova: Ne do të jemi mirë, brenda një ose dy ditësh, njerëzit do ta kenë harruar atë. Nuk mendoj se kam folur ndonjëherë për këtë, sepse nuk munda”.
Ish-lojtari i Manchester United rrëfen atë periudhë me detaje: “Është e vështirë për mua të flas për këtë, ishte diçka ekstreme.
Kam vuajtur nga abuzimet çdo ditë, kudo që shkoja. Është e vështirë të ecësh në rrugë dhe të shohësh njerëz që të shikojnë me një sy të caktuar, të pështyjnë, të ofendojnë, të vijnë në fytyrë për të të thënë disa gjëra… Nuk haja, nuk flija, isha rrëmujë, nuk dija çfarë të bëja. Vetëm në fushë u ndjeva i sigurt. Kam kaluar momente të vështira, kam arritur t’i largoj, por më vranë nga brenda”.
“Tani e kuptoj pse bërja e këtyre intervistave me Netflix ishte kaq stresuese, – komenton Victoria, – sepse hoqa shumë prej tyre, mendoj se e bëri edhe David.
Tani gjithçka kthehet tek unë. Imagjinoni të kem një fëmijë dhe të marr kërcënime me vdekje … Davidi duhej të luante me gjithçka që po ndodhte”.
