FIFA ka nisur procedimet disiplinore kundër Luis Rubiales sot pasi presidenti i Federatës Spanjolle të Futbollit (RFEF) puthi në buzë yllin spanjoll Jenni Hermoso pas finales së Kupës së Botës për femra fundjavën e kaluar.
“Komiteti disiplinor i FIFA-s informoi sot Luis Rubiales, presidentin e Federatës Spanjolle të Futbollit, se po hap procedura disiplinore kundër tij bazuar në ngjarjet që ndodhën gjatë finales”, tha organi drejtues i futbollit botëror në një deklaratë për media, përcjellë KosovaPress.
FIFA tha se incidenti “mund të përbëjë shkelje të nenit 13 paragrafët 1 dhe 2 të kodit disiplinor të FIFA-s”.
Ylli spanjoll Hermoso lëshoi një deklaratë të përbashkët me sindikatat Futpro të mërkurën, e cila bëri thirrje që të ndërmerren veprime kundër presidentit të RFEF.
“Ne po punojmë për të siguruar që akte të tilla si ato që kemi parë të mos kalojnë kurrë pa u ndëshkuar, që ato të sanksionohen dhe që mesazhet dashamirëse të miratohen për të mbrojtur femrat e futbollit nga veprimet që ne besojmë se janë të papranueshme”, thuhet në deklaratë.
Liga e futbollit për femra në Spanjë, Liga F, gjithashtu bëri thirrje që Rubiales të shkarkohet.
Rubiales, 46 vjeçar, fillimisht sulmoi kritikët e tij përpara se të kërkonte falje, por kritikat për sjelljen e tij nuk janë zbutur.
