Napoli duhet të mos humbasë nesër kundër Udineses për ta festuar titullin e tretë në Serie A, pasi Lazio mundi sonte Sassuolo 2:0, për të shtyrë festën në Napoli, së paku për 24 orë.
Nëse Lazio nuk do të kishte fituar në ‘Olimpico’, Napoli do të ishte kampion që sonte. Felipe Anderson e çoi Lazion në epërsi në minutën e 15-të, por paqartësia e ndeshjes zgjati deri në minutën e 92-të, kur Toma Basic dyfishoi epërsinë.
Në ndeshjet e tjera të xhiros së 33-të të Serisë A, Interi “shpartalloi” Veronën 6-0, derisa shpresat e Milanit dhe Romës për një vend në Ligën e Kampionëve po zhduken ngadalë pas barazimeve të papritura.
Milani mezi shpëtoi një pikë në shtëpi kundër skuadrës së 19-të në renditje, Cremoneses, ndërsa Roma luajti 1:1 edhe në Monza.
