Çfarë mund të jetë më e bukur se të kthehesh në shtëpi në fund të një karriere plot suksese, vlerësime dhe rekorde?
Ky është fjalimi që Angel Di Maria ka bërë shumë herë dhe për të cilin është folur shpesh për një rikthim në Rosario Central të ‘Fideos’.
Një situatë që mund të ndodhë jo vetëm për yllin e Juventus-it, por për shumë bashkëkombës të tij dhe në përgjithësi për shumë fenomene të futbollit të Amerikës së Jugut.
Kjo situatë mund të shqetësojë edhe talentin argjentinas Lionel Messi, legjendë e futbollit argjentinas dhe botëror. Eksperienca në PSG e Pleshtit nuk po zhvillohet siç e ka imagjinuar vetë futbollisti.
Treshja e ëndrrave me Neymar dhe Mbappe nuk ka sjellë triumfe në Champions League dhe prej disa kohësh flitet për një rikthim të bujshëm te Barcelona, klubi që e futi në Olimpin e futbollit botëror.
Po, por përpara se të vishte fanellën blaugrana, ku luante kampioni argjentinas?
Në Newell’s Old Boys, klubi i futbollit me qendër në Rosario që Messi i tha lamtumirë në moshën e butë vetëm 13 vjeç për t’u transferuar në Spanjë dhe për të siguruar tituj dhe kënaqësi. Tani po flitet për një rikthim të bujshëm në Argjentinë, një mundësi që i bën të gjithë tifozët e Amerikës së Jugut të ëndërrojnë.
“Messi është ëndrra e të gjithëve, shumë tifozë argjentinas e duan atë këtu dhe me të Newell’s do të ishte skuadra më e ndjekur në kontinent. Koha do të tregojë nëse do të vijë apo jo, por ne po e presim”, tha nënkryetari i klubit argjentinas, Pablo Allegri, gjatë një interviste për AS.
“Edhe ne po e ndjekim këtë ëndërr, sepse njerëzit duan ta nderojnë me këtë fanellë dhe ne me të vërtetë duam ta shohim përsëri me ne”, ka përfunduar Allegri.
Fjalët e një prej eksponentëve kryesorë të klubit të Amerikës së Jugut hapin rrugën për një tundim që mund të jetë i vështirë për kampionin e Albiceleste-s ta injorojë.
Në të kaluarën, vetë Messi ka deklaruar disa herë se po mendon seriozisht ta mbyllë karrierën aty ku nisi gjithçka, në klubin që një ditë të bukur gjeti në derë emisarët e Barcelona-s, të dashuruar me këtë talent që dukej se vinte nga një planet tjetër.
Vetëm koha do të tregojë nëse kthimi i Pleshtit te Newell’s duhet të konsiderohet thjesht një ide fantashkencore – dhe fantazi futboll – apo nëse historia do të ketë vërtet një fund të jashtëzakonshëm të lumtur.
