Legjenda e futbollit të Kosovës, Kujtim Shala, gjatë një interviste për mediumin kroat “Index.hr”, pati treguar se policia e regjimit serb, e kishte provokuar me një pyetje gruan e tij në vitet e 90-ta.
E gjitha kishte ndodhur si shenjë hakmarrje në vitet e 90-ta, pasi që Kujtim Shala me 17 tetor të vitit 1990 u paraqit për kombëtaren e Kroacisë në ndeshjen revyale ndaj Shteteve të Bashkuara të Amerikës, tetë muaj para vdekjes përfundimtare të Jugosllavisë artificiale.
“Për shkak të lojës për Kroacinë dhe shprehjes së pikëpamjeve pro-kroate gjatë kohës që luaja për Dinamon e Zagrebit, nuk më lejuan të shkoja në Kosovë për gati dhjetë vjet, derisa serbët u tërhoqën nga atje.
Gruaja ime po shkonte atje gjatë asaj kohe dhe posa mbërriti në aeroportin e Prishtinës, policët serbë e provokuan: ‘Ku është ai ustashi juaj, ai shqiptari, le të vijë që të na rrahë.
Gruaja ime e zgjuar dhe e guximshme ia kthen bukur: “Ti shko merre në Zagreb dhe sille’.
Pas kësaj ata u ndalën”, ka treguar Shala për mediumin kroat.