Emiliano Martinez u kthye në heroin e Argjentinës me dy penalltitë e pritura ndaj Virgil Van Dijk dhe Steven Berghuis. Portieri që luan në Premier League me Aston Villa, ndihmoi kombëtaren albiceleste të kualifikohej në gjysmëfinalen e Kupës së Botës.
“Gardiani” 30-vjeçar foli pas suksesit ndaj Holandës, teksa nuk i kurseu thumbimet ndaj arbitrit spanjoll Lahoz.
“Unë nuk jam hero, thjesht bëra detyrën time pasi shokët e ekipit kishin zhvilluar një ndeshje të shkëlqyer.
Arbitri dha 10 minuta shtesë pa asnjë arsye, ndoshta donte të kualifikohej Holanda… Kroacia? I kemi cilësitë për të vazhduar përpara dhe për të siguruar finalen e madhe”, deklaroi portier i kombëtares argjentinase.