Kombëtarja e Kosovës U19 e ka zhvilluar grumbullimin e radhës përgatitor në prag të kualifikimeve për Kampionatin Evropian “Malta 2023”.
Dardanët U19 janë të përfshirë në Grupin 3, bashkë me Ukrainën, Suedinë dhe Qipron. Ndeshjet e këtij grupi do të zhvillohen në Suedi, më 17, 20 e 23 nëntor të këtij viti.
Dy skuadrat e para të grupit kalojnë në “Elite Round”, së bashku me skuadrën e tretë më të mirë nga 13 grupet e kësaj faze eliminatore.
Përzgjedhësi i kësaj grupmoshe, Ramiz Krasniqi, ka theksuar se qëllimi i këtij grumbulli është ta shohë formën e lojtarëve vendor.
“Në këtë grumbullim janë 80% futbollistë vendor dhe duam të shohim formën dhe përgatitjen e tyre. Fati i keq është se një grup i futbollistëve pas turneut në Itali kanë mbetur me menaxherët e tyre në kërkim të klubeve të ndryshme dhe kjo ka zgjatur gati 3 muaj.
Të njëjtit futbollistë nuk kanë qenë në kontinuitet të ndeshjeve, të përgatitjes fizike dhe automatikisht kjo është shfaqur në formën e tyre. I kam përcjell ndeshjet e tyre dhe u kam treguar se jam i pakënaqur dhe u kam kërkuar ta rikthejnë formën, sepse përndryshe nuk do të udhëtojnë në Suedi.
E pikërisht ky grumbullim është një test për të parë e kanë rikthyer formën”, ka theksuar Krasniqi. Ai ka thënë se nuk ka shumë njohuri për kundërshtarët, por ka vlerësuar se Ukraina mund të jetë skuadra më e fortë e grupit në bazë të rezultateve të mëhershme.
