Juventusi synon ta mbyllë në mënyrën më të mirë sezonin duke blinduar vendin në Champions League dhe duke triumfuar në Kupën e Italisë, me titullin në Serinë A që mbetet një ëndërr pavarësisht diferencës së ngushtuar me Milan-in kryesues.
Drejtuesit e klubit bardhezi kanë filluar të planifikojnë strategjitë e merkatos për sezonin e ardhshëm, në të cilin Zonja e Vjetër nuk do të ketë më në dispozicion Pualo Dybala-n, pas dështimit të negociatave për rinovimin e kontratës së argjentinasit.
Për këtë arsye duhet gjetur një lojtar cilësor për të zëvendësuar numrin aktual 10 dhe, për momentin, emrat kryesorë në listën e Cherubini-t janë Zaniolo dhe Raspadori.
Megjithatë, nga Spanja ka ardhur një emër tjetër i rëndësishëm. Portali spanjoll Don Balon ka folur për një interesim të bardhezinjve për Joao Felix.
Talenti portugez duket se nuk është i kënaqur me stolin e lojës të Simeone-s në Madrid dhe do të ishte i hapur për një largim të mundshëm në fundin e sezonit.
Ndër të tjera, në rast se Atletico Madrid nuk do të arrijë të kualifikohet në edicionin e ardhshëm të Champions League, edhe menaxheri i tij Jorge Mendes do të këmbëngulte që të largohej nga Colchoneros.
Joao Felix vlerësohet mes 70 dhe 80 milionë euro dhe përveç Juventus-it duket se ka përfunduar edhe në radarët e Arsenal-it nëse do të vendosë të ndërrojë skuadër.
Cherubini e Allegri nuk do të ndaleshin vetëm te luzitani në shtëpinë e Atletico Madrid. Dihet për interesin e Zonjës së Vjetër për Renan Lodi, objektivi kryesor për krahun e majtë të mbrojtjes.
Për t’ia marrë brazilianin Simeone-s do të duhen 30-35 milionë euro dhe bardhezinjtë do të duhet të bëjnë kujdes edhe nga konkurrenca e Newcastle dhe Everton.