Kombëtarja e Kosovës U17 ka pësuar humbje nga Turqia U18. Sips FFK-së, Kosova megjithatë ka fituar përvojën e duhur për “Elite Round” .
Kombëtarja e Kosovës U17 e ka zhvilluar miqësoren e dytë me Kombëtaren e Turqisë U18. Ndeshja e luajtur të premten në fushën me bari natyral në Kompleksin e FFK-së në Hajvali u mbyll me shifrat 0:1.
Loja në përgjithësi ishte e baraspeshuar dhe shumë e fortë në mesfushë, me disa raste shënimi nga të dyja ekipet. Dardanët, ndonëse në moshë më të re se kundërshtarët, patën paraqitje shumë të mirë dhe u treguan rivalë të barabartë gjatë gjithë ndeshjes.
Megjithatë, ashtu sikurse në ndeshjen e parë edhe këtë herë turqit arritën të gjejnë golin pas minutës së 80-të, kur një harkim nga krahu i djathtë e shfrytëzoi Muhamed Mustafa Pinarci, duke e dërguar topin në rrjetë.
Përzgjedhësi Arsim Abazi pas ndeshjes u shpreh i kënaqur me paraqitjen e ekipit në këto dy ndeshje miqësore dhe optimist se edhe në fazën “Elite Round” të kualifikimeve ekipi i tij do të tregojë lojëra të mira dhe do të arrijë kualifikimin e shumëpritur në Evropianin “Izraeli 2022”. Shorti për këtë fazë do të tërhiqet më 8 dhjetor, derisa ndeshjet e këtij rrethi do të luhen në pranverën e vitit të ardhshëm.
Ndeshjen e sotme nga afër e ka ndjekur edhe presidenti Agim Ademi, si dhe një numër i konsiderueshëm i shikuesve.
