E ardhmja duket e ndritur për Etien Taren, djalin e ish-futbollistit të Shqipërisë, Igli Tare.
Duket se Tare Junior ka trashëguar cilësitë më të mira nga i ati dhe në këtë sezon është duke udhëhequr Lacion në kampionatin e të rinjve Primavera, Grupi B.
Këtë më së miri e tregojnë statistikat e katër takimeve të fundit, ku 18-vjeçari shqiptar ka shkëlqyer falë realizimit të katër golave.
Sakaq, Tare nuk është mjaftuar vetëm me golat, ndërsa është treguar bujar edhe me shokët e skuadrës duke shtuar dy asistime në llogarinë e tij.
Në këtë formë, falë edhe kontributit të Tares që është kthyer në pikë referimi për kryeqytetasit, bardhekaltërit kanë grumbulluar 18 pikë në 7 javët e para dhe ndajnë vendin e parë të klasifikimit së bashku me Frosinonen.
