Italia ia ka dalë të triumfojë në finalen e vogël të Ligës së Kombeve duke mundur Belgjikën me rezultatin 2-1.
Pjesa e parë u mbyll në barazim 0-0, por pjesa e dytë nisi menjëherë e vrullshme. Mesfushori i Interit, Nikolo Barela kaloi axurrët në avantazh me një supergol në minutën e 47-të të takimit.
Në minutën e 65-të, Berardi u tregua i saktë nga pika e 11-metërshit duke shënuar dhe të dytin për Italinë. Belgjika u kujtua vetëm në fund me talentin Ketelar që mposhti Donarumën pas një aksioni të nisur nga duart e portierit Kurtua.
Por kaq mjaftoi me Italinë që siguron vendin e tretë të turneut, ndërsa finalja e madhe ndërmjet Francës dhe Spanjës do të luhet mbrëmjen e sotme në orën 20:45.
