Pas zgjedhjes së Fiorentinës për të mos rinovuar kontratën e tij, Franck Ribery, tani pa ekip, u kthye për të folur në mikrofonat e “Toscana Tv”: “Nuk ishte një lamtumirë e lehtë.
Unë jam një person i vërtetë dhe realisht dhashë gjithçka, siç është në mentalitetin tim. Për tri ose katër javë nga Fiorentina askush nuk më thirri, pata ndjenjën se mungonte respekti për angazhimin tim. Më dukej se këto dy vite në të cilat dhashë gjithçka nuk u njohën.
Dhashë më të mirën time, do të doja të qëndroja në Itali”.
Kampioni francez ende nuk e ka vendosur të ardhmen e tij, por përsëri do të donte të qëndronte në Itali: “Unë me të vërtetë kisha menduar për të vazhduar në Firence, kurrë nuk e kam kritikuar klubin, kam kujtime të mira. Do të doja të qëndroja në Itali, të luaja në këtë kampionat. Dy vite me Fiorentinën ishin një përvojë e mirë për mua, ato nënkuptojnë shumë. Nuk ishin dy vite të lehta, por takova një qytet të bukur dhe shumë njerëz dashamirës.
Dhashë më të mirën time për ekipin dhe për tifozët. Sa keq, do të doja të vazhdoja edhe një vit, por jeta dhe futbolli janë kështu. Unë kam qenë gjithmonë në dispozicion, edhe në momentet më të vështira”.
