Matematikisht janë 4 ekipe në luftë për titull në javën e fundit të Kategorisë Superiore dhe si asnjëherë tjetër në dekadën e fundit të kampionatit, nuk ka patur një rivalitet të tillë.
Pati shumë pikëpyetje për ceremoninë e titullit apo ku duhej të shkonte kreu i FSHF i cili do të premiojë dhe skuadrën fituese e për këtë arsye, Komiteti Ekzekutiv i këtij institucioni u mblodh për të vendosur modalitetet e ceremonisë.
Duke parë se 90 minuta përpara fundit të sezonit në garë për titullin kampion janë katër skuadra, Komiteti Ekzekutiv vendosi organizimin e 3 ceremonive, në Ballsh, Durrës dhe Shkodër. Në të tre qytetet do të jetë trofeu i kampionit, zyrtarë të lartë të Federatës Shqiptare të Futbollit, ndërkohë që Presidenti Duka i cili do të dorëzojë trofeun, do të udhëtojë drejt stadiumit ku do të dorëzohet titulli menjëherë pas përfundimit të lojës së rregullt”, thuhet në njoftimin e Komitetit Ekzekutiv pas mbledhjes.
Pra në tre sfidat e fundit ku luhet titulli, Bylis-Partizani, Teuta-Apolonia, Vllaznia-Laçi do të ketë një trofe në këto stadium që festa e titullit të jetë gati për çdo rast të mundshëm. Edhe pse në letër, Teuta është kampion, proçedura e kërkon por edhe futbolli mund të sjellë të papritura ndaj dhe trofeu do të jetë në Ballsh, në Durrës dhe në Shkodër.
