Presidenti iranian Ebrahim Raisi nuk ishte lideri i parë që vdiq në një përplasje helikopteri.
Ekziston një listë e gjatë e figurave politike dhe ushtarake evropiane që janë vrarë në aksidente apo incidente misterioze, pavarësisht nga masat shpesh të rrepta të sigurisë që zbatohen për t’i mbrojtur ata.
Shumica e përplasjeve vdekjeprurëse të helikopterëve ose avionëve shkaktohen nga defekte teknike, gabime të pilotit ose moti i keq, por disa janë gjithashtu të lidhura me teori konspirative.
Këto janë disa nga rastet më të njohura, disa prej të cilave mbeten të pazbardhura edhe sot e kësaj dite.
Sekretari i Përgjithshëm i OKB-së Dag Hammarskjöld
Dag Hammarskjöld, një diplomat i famshëm suedez, u vra në një aksident avioni pasagjerësh në Zambia më 18 shtator 1961.
Por rrethanat e aksidentit janë ende të paqarta.
Sekretari i dytë i Përgjithshëm i Kombeve të Bashkuara ishte në një avion që i përkiste linjës ajrore suedeze Transair me destinacion Republikën e Kongos.
Ai ishte rrugës për të marrë pjesë në bisedimet e armëpushimit midis forcave të OKB-së dhe trupave nga Katanga, një provincë e shkëputur në Kongo, kur ndodhi përplasja.
Të 16 pasagjerët në bord u vranë.
Një hetim i vitit 1962 pretendoi se shkak i aksidentit ishte gabimi i pilotit me aeroplanin që fluturonte në lartësi të ulët.
Megjithatë, The Guardian raportoi në vitin 2011 se kishte prova të reja që avioni u rrëzua mbi Rodezinë Veriore (tani Zambia), me autoritetet koloniale britanike që dyshohet se mbuluan incidentin.
Kompanitë e minierave dhe ish-shërbimi inteligjent i Rusisë, KGB, janë akuzuar veçmas se qëndrojnë pas komplotit të supozuar.
Kryeministri jugosllav Džemal Bijedić
Džemal Bijedić ishte një politikan boshnjak që shërbeu si Kryeministër i Republikës Socialiste Federative të Jugosllavisë.
Bijedić, i cili luftoi në Luftën e Dytë Botërore si partizan jugosllav, por bëri emër në një varg rolesh të profilit të lartë politik, u vra në vitin 1977 kur Leerjet-i i tij u përplas në malin Inaç në Bosnje-Hercegovinë.
U vranë edhe gruaja e tij Razija dhe gjashtë të tjerë.
Moti i keq është fajësuar për incidentin, por kjo nuk i ka ndaluar teoricienët e konspiracionit të dyshojnë për një komplot të keq nga rivalët e tij.
Bijedić u konsiderua nga disa si pasardhës i Titos së plakur, i cili udhëhoqi lëvizjen partizane dhe drejtoi shtetin socialist që nga viti 1945. Tito, nga ana tjetër, vdiq tre vjet më vonë nga komplikimet për shkak të gangrenës dhe Jugosllavia u shpërbë në një seri luftërash në vitet 1990.
Kryeministri portugez Francisco Sá Carneiro
Një emër i njohur që nga Revolucioni i Karafilit të vitit 1974, Francisco Manuel Lumbrales de Sá Carneiro udhëhoqi Aleancën Demokratike të krahut të djathtë që fitoi zgjedhjet e përgjithshme të Portugalisë në 1979.
Por fitorja e tij ishte jetëshkurtër.
Gjatë rrugës për në një tubim elektoral në Porto, Cessna e politikanit popullor u përplas në një ndërtesë vetëm pak çaste pas ngritjes.
Një hetim fillestar i përbashkët nga policia dhe zyrtarët e aviacionit civil vendosi se përplasja ishte shkaktuar nga dështimi i motorit.
Megjithatë, analiza moderne kimike e pjesëve të rrënojave të avionit në vitin 2004 tregoi se një bombë ishte vendosur nën kabinë.
Ekzistojnë teori të ndryshme se objektivi i atentatit të supozuar ishte Ministri i Mbrojtjes Adelino Amaro da Costa, i cili po udhëtonte me Carneiro.
Presidenti i Polonisë Lech Kaczyński
Lech Kaczyński ishte president i Polonisë derisa vdiq në një aksident avioni më 10 prill 2010.
Përplasja ndodhi pranë Smolenskut në Rusinë perëndimore, duke vrarë të gjithë 96 pasagjerët.
Shumë zyrtarë të lartë ushtarakë, anëtarë të parlamentit polak, personalitete dhe gruaja e Kaczyński-t ishin në bordin e aeroplanit që duhej të merrte delegacionin për të shënuar 70-vjetorin e masakrës së Katinit, ku mijëra oficerë polakë u ekzekutuan nga sovjetikët gjatë Luftës së Dytë Botërore.
Avioni u përpoq të ulej në mjegull të dendur në aeroportin verior të Smolensk, pavarësisht paralajmërimeve për kushtet e këqija të motit dhe këshillave për të devijuar në një aeroport tjetër.
Ai u përplas me majat e pemëve, humbi kontrollin dhe u përplas në pyllin pranë pistës.
Përplasja kishte implikime të rëndësishme për Poloninë.
Aksidenti e zhyti vendin e Evropës Lindore në zi dhe ngriti pyetje në lidhje me vendimet që çuan në rrëzimin, duke përfshirë presionin e mundshëm ndaj pilotëve dhe nëse avioni ishte adekuat.
Tragjedia ndezi gjithashtu debate për marrëdhëniet polako-ruse, duke pasur parasysh kontekstin historik të masakrës së Katinit dhe tensionet e vazhdueshme politike.
Ndërsa Kaczyński u shndërrua në një figurë martire kombëtare, vëllai i tij binjak Jarosłaë – lider jozyrtar i partisë së krahut të djathtë nacionalist Pis – përdori vdekjen e Lech për të paralajmëruar për ndërhyrjen ruse dhe ndikimin keqdashës në vend.
Valeriya Novodvorskaya, një politikane ruse, pretendoi se Kremlini vrau Kaczyński. Ajo nuk ka paraqitur prova për këtë pretendim.
