Presidenti ukrainas Volodymyr Zelensky i ka bërë thirrje botës që t'i përgjigjet çdo manifestimi të agresionit rus, pasi fëmijët ukrainas po bëhen objektiva ushtarakë për Federatën Ruse.
Këtë ai e ka thënë përmes një postimi në Facebook, transmeton Ukrinform. Kreu i shtetit publikoi një video nga vendi ku një dron goditi një ndërtesë banimi në Odesa, ku një operacion kërkim-shpëtimi po vazhdon.
"Deri më tani janë raportuar të vrarë dhjetë persona, duke përfshirë tre fëmijë: Mark, i cili ishte gati të mbushte tre vjeç, Yelyzaveta, e cila ishte tetë muajsh dhe Tymofiy, e cila ishte katër muajsh. Rusia i ka bërë objektivat e saj ushtarakë fëmijët ukrainas. Ja me kë luftojnë këto bisha”, tha Zelensky, duke shprehur ngushëllimet e tij për të dashurit e viktimave.
Sipas tij, pesë persona janë shpëtuar. Ka mundësi që nën rrënoja të ketë ende fëmijë. Kërkimet janë duke vazhduar dhe do të vazhdojnë derisa të dihet fati i të gjithë atyre që ishin në ndërtesë, tha Zelensky. Ai shtoi se të gjitha viktimave po iu ofrohet ndihma e nevojshme.
Natën e 1-2 marsit, pushtuesit rusë sulmuan Odesën me dronë kamikaze. Droni goditi një bllok apartamentesh, duke shkatërruar një pjesë të një seksioni prej 18 apartamentesh të ndërtesës. Sulmi me dron ka vrarë tashmë dhjetë persona, duke përfshirë katër gra dhe tre fëmijë.
