Një sasi e madhe droge e llojit kokainë është sekuestruar në portin e Gioia Tauro në Itali. Mediat vendase shkruajnë se autoritetet në Reggio Calabria dhe zyrtarët e zyrës doganore gjetën dy ton e 734 kilogramë kokainë të pastër në dy kontejnerë që vinin nga Guayaquil, Ekuadori, me destinacion Armeninë, nëpërmjet portit të Batumi, Gjeorgji.
Droga ishte e vendosur në kontejnerë, në një ngarkesë frutash të përbërë nga 78 ton banane.
Operacioni që çoi në sekuestrimin e gati tre tonëve kokainë, me qëllim luftën ndaj trafikut ndërkombëtar të drogës, u krye me koordinimin dhe drejtimin e Drejtorisë Antimafia të Qarkut Reggio Calabria.
Kokaina u zbulua pas operacioneve të gjata dhe komplekse të kërkimit, me ndihmën e skanerëve të sofistikuar të furnizuar nga Dogana dhe njësitë e qenve të Guardia di Finanza, me qenin nuhatës të drogës Joel.
Ndër të tjera në media shkruhet se droga ishte e fshehur në gjashtë kontejnerë në mënyra të ndryshme: mes mallrave, në funde false ose përsëri në zgavrat e jashtme të kutive.
Metodat e fshehjes së drogës shpesh rezultojnë të jenë të ndryshme dhe gjithnjë në zhvillim, duke i detyruar hetuesit të perfeksionojnë herë pas here metodologjitë e operimit.
