Kompania Meta tha se kishte anuluar tre “operacione të ndikimit të brendshëm” të lidhur me shtetin në Facebook në tremujorin e fundit, secili duke përdorur rrjete llogarish të rreme për të ndikuar në politikën e brendshme dhe për të synuar partitë opozitare.
Hetuesit e kompanisë Meta zbuluan se operacionet, të lidhura me partitë dhe qeveritë në pushtet në Kubë, Serbi dhe Bolivi, ishin përfshirë në një seri “sjelljesh joautentike të koordinuara” (CIB). Çdo grup operonte përmes një sërë platformash të mediave sociale, duke përfshirë platformat Meta si Facebook, Instagram dhe WhatsApp, raporton portali specialist Jurist.
Në Kubë, llogaritë e rreme me fotografi të profilit të krijuara nga AI drejtonin faqe dhe grupe në Facebook dhe postonin përmbajtje në platforma të ndryshme, duke përfshirë informacione për figurat e opozitës dhe kritikët, të cilët ata i quajtën “krimba”, një term nënçmues i përdorur nga qeveria për t’iu referuar disidentëve.
Një rrjet i ngjashëm në Serbi, i lidhur me stafin e Partisë Progresive Serbe, i njohur si ekipi i internetit i partisë, përdorte gjithashtu llogari të rreme dhe postime të koordinuara.
Ata synuan audiencën vendase në një numër shërbimesh të internetit, duke përfshirë Facebook, Instagram, Twitter dhe YouTube, si dhe mediat lokale, për të “krijuar perceptimin e mbështetjes së gjerë dhe autentike për presidentin serb Aleksandar Vuçiq dhe Partinë Progresive Serbe”, sipas një deklaratë nga kompania Meta.
Në Bolivi, aktivitetet e lidhura me qeverinë aktuale dhe partinë MASD kanë formuar një “operacion të përzier” të sjelljes së koordinuar joautentike dhe raportimit masiv, me rrjete llogarish që abuzojnë me mjetet e moderimit të platformës për të shënuar, hequr dhe shtypur figurat e opozitës. Një nga këto faqe në Facebook kishte dy milionë ndjekës kur u mbyll.
Përpjekjet në rritje të Metës për të moderuar dhe kufizuar përmbajtjet që shkelin të drejtat e njeriut vijnë në një kohë kritikash intensive me të cilat kompania është përballur vitet e fundit për paaftësinë dhe mosgatishmërinë e saj për të kontrolluar rrjete të ngjashme, thotë Jurist.
