Akademia Ushtarake Detare në Varna (Bullgaria Verilindore, në bregun e Detit të Zi) fiton edhe një herë një vend në mesin e pesë universiteteve më të mira detare në botë, sipas renditjes ndërkombëtare të vitit 2022.
Lajmin këtë të hënë e ka bërë të ditur shefi i Akademisë Ushtarake Detare në Varna – admirali Boyan Mednikarov.
Ai deklaroi se Akademia Detare mbante vendin e 4-të në botë. Në vitin 2022 u ricertifikuar për pesë vjetët e ardhshëm si një institucion me arsim detar cilësor nga Ministria e Transportit e Japonisë. Kjo njohje u jep të diplomuarve të Akademisë mundësinë për të lundruar nën një flamur japonez pa pasur nevojë të marrin provime shtesë.
Këtë vit pritet të diplomohet klasa e parë e mjekëve ushtarakë, të arsimuar së bashku në tre universitete - Shkolla Detare, Universiteti Mjekësor i Varnës dhe Akademia Mjekësore Ushtarake e Sofjes. Mednikarov vuri në dukje se në këtë moment ata janë duke kryer praktikën e tyre shtetërore dhe po marrin provimet e fundit.
Kreu i Akademisë Detare theksoi blerjen e anijes kërkimore-studiuese detare Sv. Sv. Kiril dhe Metodii (NAVAL RSV 421), i cili po lundron për në ishullin Livingston, ku do të mbështesë Ekspeditën e 31-të Bullgare Antarktikë. Ai është i sigurt për suksesin e saj. Mednikarov shtoi se ndërtimi i pishinës së thellë pritet të përfundojë këtë vit dhe tha se akademia ka marrë një helikopter stërvitor.
Studentët i përshëndeti komandanti i Forcave Detare – admirali Kiril Mihailov.
Në përvjetor morën pjesë anëtarë të autoriteteve lokale dhe shtetërore, akademi, biznesi detar dhe oficerë. Në mesin e të pranishmëve ishte edhe shefi i Akademisë Mjekësore Ushtarake, gjenerali Ventsislav Mutafchiyski.
Shkolla Detare e Bullgarisë (më vonë Akademia Detare) u themelua më 9 janar 1881, nga kapiten-toger Aleksandër Konkevich, komandanti i parë i Marinës Bullgare. Fillimisht u gjet në Ruse të Bullgarisë Verilindore, por u zhvendos në Varna në vitin 1900. Në vitin 1949 mori emrin e poetit të njohur bullgar Nikola Vaptsarov, i diplomuar në shkollë në vitin 1926.
