Peshkopët katolikë në Itali zbuluan të enjten se mbi 600 raste të abuzimit seksual nga priftërinjtë në vend ishin në dosje në Vatikan që nga viti 2000.
Konferenca e peshkopëve italianë, e njohur si Conferenza Episcopale Italiana ose CEI, prezantoi raportin të titulluar “Mbrojtja, parandalimi, edukimi”, në një konferencë të mbushur plot në Pallatin e Rilindjes Pio të Romës.
Dokumenti identifikoi 89 viktima të supozuara dhe rreth 68 persona të akuzuar. Nga viktimat e raportuara, 61 janë identifikuar si të mitur.
Autorët e dyshuar nuk ishin vetëm priftërinj dhe anëtarë të klerit, por edhe njerëz laikë të lidhur me Kishën, duke përfshirë mësues, katekistë dhe besimtarë.
Raporti, i cili mbulonte vetëm ankesat që autoritetet lokale të kishës italiane kishin marrë gjatë dy viteve të fundit, nuk përmendi qindra raste.
Vatikani në vitin 2001 u kërkoi dioqezave anembanë botës t’i dërgonin të gjitha raportet e tyre të besueshme të abuzimit në dikasterë për përpunim.
Vatikani ishte ndjerë i detyruar të vepronte pas dekadash, në të cilat peshkopët dhe eprorët fetarë i zhvendosën priftërinjtë nga dioqeza në dioqezë në vend që t’i ndëshkonin ose t’i raportonin në polici.
