Fondi prej mbi 33 milionë euro, është prekur jo për ndonjë rast të papritur, por paratë nga aty janë marrë për të mbuluar vendimin e Qeverisë së kaluar për rritjen e pagave prej 25 për qind, e ky shfrytëzim i fondit rezervë po shihet si i paligjshëm.
Ish-ministri i Financave, Haki Shatri, ka thënë se kjo ka ardhur si pasojë e një vendimi për rritje pagash që kishte marrë ish-kryeministri Thaçi.
Shatri ka thënë se asnjëherë as formalisht në Kuvend nuk është formalizuar rritja e pagave.
“E kanë shfrytëzuar fondin 45 milionësh me destinim të veçantë për Administratën Publike dhe për disa investime në veri, krejt ato mjete i kanë marrë dhe i kanë plotësuar në rastin për rritje pagash”, ka thënë Shatri për gazetën “Zëri”.
Ai po ashtu ka sqaruar se një pjesë e madhe e mjeteve është marrë edhe prej mallrave dhe shërbime që ishin destinuar për paga.
“Asnjëherë nuk është zyrtarizuar vendimi, si dhe i njëjti asnjëherë nuk ka kaluar në Kuvend”, ka thënë ai.
Edhe drejtori i Institutit “STRAS”, Ibrahim Rexhepi, ka thënë se prekja e rezervave buxhetore është e ndaluar me ligj. Rexhepi ka thënë se ky është një veprim në formën e kaubojve.
“Thjesht për të mos ardhur te problemet sociale dhe për të mos pasur probleme me paga është vepruar në këtë formë”, ka thënë ai.
