Në më pak se dy vjet luftë në Ukrainë, Rusia ka humbur më shumë se 2900 tanke kryesore beteje – afërsisht të gjitha tanket që kishte “në lëvizje” përpara pushtimit.
Por, stoqet e mbetura nga koha sovjetike do të jenë të mjaftueshme për më shumë se një vit luftime, edhe nëse prodhimi aktual nuk merret parasysh, sipas ekspertëve nga Instituti Ndërkombëtar për Studime Strategjike (IISS).
Moska e kompenson cilësinë e ulët të veprimeve në fushën e betejës me sasi, sipas raportit vjetor të institutit për forcat e armatosura botërore, The Military Balance.
Ajo ka hedhur mijëra tanke të vjetra nga stoqet dhe magazinat në frontin e Ukrainës, ndonjëherë duke dërguar 90 automjete në muaj.
Pavarësisht këtij ritmi, Rusia është e gatshme dhe e aftë të vazhdojë të dërgojë pajisje ushtarake në front.
Rusia tani ka 4000 tanke në magazinë ndërsa 1750 aktualisht i ka aktive në luftë, duke filluar nga T-55 e vjetër deri te T-80 dhe T-90 moderne.
