Qeveria federale e Zvicrës ka vendosur të ndalojë lëvizjen islamike palestineze Hamas në një projektligj të dorëzuar në parlament, sipas një deklarate të lëshuar sot.
Këshilli Federal (qeveria) "vendosi të hartojë një ligj që synon ndalimin e Hamasit. Ai e konsideron këtë opsion si zgjidhjen më të mirë për t'iu përgjigjur situatës që mbizotëron që nga 7 tetori në Lindjen e Mesme" dhe sulmit të paprecedentë të lëvizjes islamike në territorin izraelit.
Katër ditë pas këtij sulmi, i cili la 1200 të vdekur nga pala izraelite, kryesisht civilë, dhe 240 pengje u morën në Gaza, Këshilli Federal "vlerësoi se Hamasi duhet të cilësohej si një organizatë terroriste".
"Ky ligj do t'u japë autoriteteve federale mjetet e duhura për të luftuar aktivitetet e mundshme të Hamasit ose mbështetjen për organizatën në Zvicër," shpjegoi qeveria në një deklaratë për shtyp.
Qëndrimet e marra nga partitë kryesore të vendit lënë pak dyshime për rezultatin e votimit.
UDC (e djathta radikale), partia udhëheqëse në vend e cila forcoi më tej pozitën e saj në zgjedhjet parlamentare të 22 tetorit, kërkoi me forcë këtë masë, ashtu si edhe organizatat hebraike në vend.
Bashkimi Evropian dhe Shtetet e Bashkuara, ndër të tjera, tashmë e cilësojnë Hamasin si "organizatë terroriste".
Pas sulmit të 7 tetorit, Izraeli u përgjigj duke bombarduar pa pushim Gazën.
