Bizneset turistike në Bansko raportojnë rezultate të mira në sezonin e verës. Në muajt e ngrohtë të vitit Bansko është plot, dhe krahasuar me vitin e kaluar shifrat janë të njejta, tha për BTA, Malin Bistrin, kryetar i Unionit të Biznesit Turistik – Bansko. Ai theksoi se në vitin 2022 sezoni veror në resort ishte i jashtëzakonshëm. "Jemi të lumtur që bullgarët e frekuentojnë Banskon gjithnjë e më shumë si destinacion," vuri në dukje kryetari i bashkimit turistik vendas.
Turistët e huaj nga destinacionet si Izraeli, vendet e Ballkanit e të tjera tashmë po kthehen. Së bashku me tregjet tashmë të krijuara, Bansko po tërheq edhe turistë nga vende si Spanja, Austria dhe Norvegjia, të cilat nuk janë mjaft tipike për turizmin veror të Bullgarisë, por tashmë kanë filluar të shfaqen "dukshëm" në hartën turistike të Banskos, tha Bistrin.
Gjatë sezonit të verës, në Bansko u ofrua një program i pasur kulturor dhe sportiv, që do të vazhdoj edhe në shtator. Në fundjavën e parë të muajit, qyteti do të mbajë festivalin e sivjetshëm të kuzhinës "Unique Bansko", duke filluar të shtunën në orën 17:00, në sheshin qendror.
Në këtë event do të demonstrohen recetat që janë përcjellë në familje nga brezi në brez. Festivali "Unique Bansko" është i lidhur edhe me prodhuesit vendas, kujdestarët e riteve dhe zakoneve dhe zejeve të vjetra.
Festa tashmë është e njohur për të ftuarit, dhe sipas Bistrinit po bëhen prenotime në të gjithë rajonin. Në ditën e dytë të festivalit, të dielën, në sheshin kryesor në orën 10:30 do të fillojë një shfaqje e kostumeve popullore bullgare dhe një punëtori artistike për fëmijë.
